ឯកឧត្តមអភិសន្តិបណ្ឌិត ស សុខា បានលើកឡើងថា ក្រោយប្រទេសកម្ពុជាមានការប៉ះទង្គិចជាមួយប្រទេសថៃ ក្រសួងមហាផ្ទៃបានសម្រេចផ្អាកការផាកពិន័យអ្នកបើកបរល្មើសច្បាប់ចរាចរណ៍ ហើយជំនួសដោយធ្វើការណែនាំ ។
ក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងទិវាសប្តាហ៍ជាតិសុវត្ថិភាពចរាចរណ៍ផ្លូវគោក លើកទី១៧ នៅបរិវេណឆ្នេរព្រែកកំពង់បាយ មុខមន្ទីរពេទ្យបង្អែកខេត្តកំពត នៅព្រឹកថ្ងៃទី១៥ ខែមិថុនា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោកថ្លែងថា ក្រោយប្រទេសកម្ពុជាមានការប៉ះទង្គិចជាមួយប្រទេសថៃ ពាក់ព័ន្ធនឹងបញ្ហាព្រំដែន ក្រសួងមហាផ្ទៃបានសម្រេចផ្អាកការផាកពិន័យការល្មើសច្បាប់ចរាចរណ៍ ហើយជំនួសដោយធ្វើការណែនាំ តែវិធានការសំខាន់ៗមួយចំនួននៅតែបន្តអនុវត្តន៍ ពិសេសការពិនិត្យជាតិអាល់កុល និងការពិនិត្យអាវុធជាតិផ្ទុះជាដើម។
ឯកឧត្តមអភិសន្តិបណ្ឌិតបន្តថា ក្រោយមានការផ្អាកការផាកពិន័យ គ្រោះថ្នាក់ចរាចរណ៍មានការកើនឡើង ។ ដូច្នេះ ឯកឧត្តមស្នើដល់ប្រជាពលរដ្ឋដែលជាអ្នកប្រើប្រាស់យានយន្តទាំងអស់ ត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីរួមគ្នាកាត់បន្ថយគ្រោះថ្នាក់ចរាចរណ៍ឱ្យនៅទាបបំផុត។
ក្នុងនាមគណៈកម្មាធិការជាតិសុវត្ថិភាពចរាចរណ៍ផ្លូវគោក ឯកឧត្តមអភិសន្តិបណ្ឌិត អំពាវនាវអ្នកប្រើប្រាស់ផ្លូវ និងក្រុមហ៊ុនដឹកជញ្ជូនចូលរួមអនុវត្តតាមអនុសាសន៍ដ៏ថ្លៃថ្លារបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា “ថ្ងៃនេះ ថ្ងៃស្អែក” កុំឱ្យមានគ្រោះថ្នាក់ចរាចរណ៍ ជាមួយនឹងការយកចិត្តទុកដាក់បើកបរប្រកបដោយការទទួលខុសត្រូវ ។ ក្នុងនោះ ត្រូវអនុវត្តវិធានការសំខាន់ៗ ដូចជា ៖ ត្រូវបើកបរឱ្យបានត្រឹមត្រូវជាដាច់ខាត , មិនត្រូវបើកបរលើសល្បឿនកំណត់ , មិនត្រូវបើកបរក្នុងឥទ្ធិពលគ្រឿងស្រវឹង និងគ្រឿងញៀន , មិនត្រូវបើកបរក្រោមភាពងងុយដេក , ត្រូវពាក់មួកសុវត្ថិភាព , ត្រូវពាក់ខ្សែក្រវាត់សុវត្ថិភាព , ត្រូវប្រកាន់ស្តាំ , ត្រូវត្រួតពិនិត្យលក្ខណៈបច្ចេកទេសយានយន្ត និងត្រូវប្រុងប្រយ័ត្នជានិច្ច៕
