បើតាមការបញ្ជាក់ ពីសំណាក់មន្ត្រីជាន់ខ្ពស់របស់ក្រសួងការបរទេសរុស្ស៊ីបានឱ្យដឹងថា ទីក្រុងមូស្គូ បានប្រកាសត្រៀមខ្លួនជាស្រេចសម្រាប់ធ្វើការកែប្រែទំនាក់ទំនងឡើងវិញជាមួយសហរដ្ឋអាម៉េរិក។ នេះបើយោងតាមការចេញផ្សាយដោយសារព័ត៌មាន Tass។
លោក អាឡិចសាន់ឌឺ ហ្គូសារ៉ូវ ប្រធាននាយកដ្ឋានអាត្លង់ទិកខាងជើងនៃក្រសួងការបរទេសរុស្ស៊ីបាននិយាយថា ទីក្រុងម៉ូស្គូបានត្រៀមខ្លួនជាស្រេច ដើម្បីឆ្ពោះទៅរកការធ្វើឱ្យទំនាក់ទំនងវិលមករកសភាពធម្មតាវិញ ជាមួយទីក្រុងវ៉ាស៊ីនតោន ប្រសិនបើផលប្រយោជន៍របស់ខ្លួនត្រូវបានគោរព ហើយកិច្ចការផ្ទៃក្នុងរបស់ខ្លួនមិនត្រូវបានជ្រៀតជ្រែកពីខាងក្រៅ។
ក្នុងពេលផ្តល់បទសម្ភាសន៍ លោក ហ្គូសារ៉ូវ បានឱ្យដឹងថា លោក ដូណាល់ ត្រាំ ចាប់តាំងពីឡើងកាន់អំណាចមកបានប្រកាសពីចេតនាពិនិត្យឡើងវិញនូវអាកប្បកិរិយាប្រឈមមុខ និងមនោគមវិជ្ជាក្រោមរដ្ឋបាលរបស់អតីតប្រធានាធិបតីអាមេរិក លោក ចូរ បៃដិន។
លោកបានបន្តថា “ការសន្ទនាប្រកបដោយតុល្យភាព និងជាក់ស្តែង បានក្លាយជាបទដ្ឋាន បើទោះបីជាមានការខ្វែងគំនិតគ្នា ជាច្រើនក៏ដោយ។ ទំនាក់ទំនងទ្វេភាគី ដែលមានប្រយោជន៍ជាច្រើនបានកើតឡើង រួមទាំងនៅកម្រិតខ្ពស់បំផុត”។
គួរបញ្ជាក់ថា ការអះអាងនេះបានធ្វើឡើង បន្ទាប់ពីប្រធានាធិបតីនៃប្រទេសទាំងពីរ ធ្លាប់បានជួបគ្នាជាប្រវត្ថិសាស្ត្រនៅទឹកដីអាម៉េរិក កាលពីឆ្នាំមុន ហើយបានបន្តជជែកគ្នាតាមទូរស័ព្ទជាបន្តបន្ទាប់ទៀត។ ជាងនេះទៀតបើតាមមន្ត្រីរុស្ស៊ីបានឱ្យដឹងថា ប្រធានាធិបតីអាម៉េរិក លោក ដូណាល់ ត្រាំ អាចនឹងបំពេញទស្សនកិច្ចនៅទីក្រុងមូស្គូ នៅឆ្នាំនេះដែរ៕
