មុនដល់ថ្ងៃបុណ្យចូលឆ្នាំប្រពៃណីជាតិខ្មែរ ឯកឧត្តមអភិសន្តិសបណ្ឌិត ស សុខា បានផ្ញើសារទៅកាន់ក្រុមយុវជននិងយុវតីថា អនាគតរបស់ប្អូនៗ លើសពីនៅតាមដងផ្លូវ ចូរជ្រើសយកអំណាច កុំយកពន្ធនាគារ ព្រោះទាំងយុវជននិងយុវតីសុទ្ធតែមានតម្លៃដូចគ្នាសម្រាប់សង្គមជាតិ។
ឯកឧត្តមអភិសន្តិសបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅថ្ងៃទី១០ ខែមេសា ឆ្នាំ២០២៦បានថ្លែងថា យុវជន ដ៏មានតម្លៃ និងយុវតី ដ៏មានកិត្តិយសកំពុងឈរនៅត្រង់ចំណុចរបត់ដ៏សំខាន់នៃជីវិត។
ឯកឧត្តមបន្តថា យុវជនៗជាមនុស្សឆ្លាតវៃ ជាមនុស្សរឹងមាំដែលមានសុបិនកំពុងពុះកញ្ជ្រោលនៅក្នុងចិត្ត ប៉ុន្តែឥឡូវនេះ ប្រហែលជាមានក្រុមក្មេងទំនើងកំពុងនិយាយអូសទាញក្នុងត្រចៀករបស់ក្រុមយុវជនថា ចូលមកជាមួយពួកយើង ពួកយើងការពារអ្នក ពួកយើងជាគ្រួសារតែមួយ យើងនឹងធ្វើឱ្យអ្នកក្លាយជាមនុស្សមានតម្លៃម្នាក់។ ប៉ុន្តែចំណុចនេះ ឯកឧត្តម ស សុខាបានបញ្ជាក់ទៅកាន់ក្រុមយុវជនថា ពាក្យសម្តីទាំងអស់នោះ គឺជាការបោកប្រាស់ ដែលសម្ងំលាក់ខ្លួនក្រោមភាពស្មោះត្រង់ក្លែងក្លាយ។ ក្រុមក្មេងទំនើងទាំងនោះ មិនអាចផ្តល់អំណាចអ្វីឱ្យយុវជនបានទេ តែពួកគេមានតែដកអំណាចចេញពីខ្លួនយុវជនទៅវិញទេ។
រដ្ឋមន្រ្តីមហាផ្ទៃ បន្ថែមថា ប៉ុន្តែពួកគេបោកប្រាស់អ្នកដោយបង្ហាញថា បានប្រាក់ បានកិត្តិយស និងបានការគាំពារ ប៉ុន្តែការពិតអ្វីដែលពួកគេផ្តល់ដល់យុវជនទាំងអស់គ្នានោះ គឺផ្លូវជាផ្លូវទ័លមួយពោរពេញទៅដោយអំពើហិង្សា ការញៀនថ្នាំ ការជាប់ក្នុងសៀវភៅកំណត់ហេតុរបស់នគរបាល និងការសោកស្តាយតែប៉ុណ្ណោះ។ ដូច្នេះ ការសិក្សាបង្ហាញថា ពេលយុវជន សម្រេចជ្រើសយកវិថីជីវិតបែបនោះ នឹងបាត់បង់ឱកាសក្នុងការសិក្សា ហើយក៏ត្រូវប្រឈមនឹងការចាប់ខ្លួន រងរបួស ឬអាចមានរឿងរ៉ាវផ្សេងៗទៀត ដែលអាក្រក់ជាងនេះ៕
