អង្គភាពប្រឆាំងអំពើពុករលួយ (អ.ប.ព.) បានកសាងសំណុំរឿង និងបញ្ជូនទៅតុលាការ កាលពីថ្ងៃទី ១៨ ខែមីនា ឆ្នាំ ២០២៦ ពាក់ព័ន្ធនឹងអនុប្រធានសាខាគយ និងរដ្ឋាករ ខេត្តកោះកុង និងបក្ខពួកចំនួន ៣ នាក់ទៀត ក្នុងករណីសង្ស័យអំពើរំលោភអំណាច និងសម្អាតប្រាក់។
យោងតាមលទ្ធផលកិច្ចប្រជុំលើកទី៨ អាណត្តិទី៤ របស់ ក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) នៅថ្ងៃទី ២៥ ខែមីនា ឆ្នាំ ២០២៦ បានបញ្ជាក់ថា ជនសង្ស័យសរុបមាន ៤ នាក់ រួមមាន៖ ១-ឈ្មោះ ម៉ៅ សាន់សូណា អាយុ ៥៨ ឆ្នាំ អនុប្រធានសាខាគយ និងរដ្ឋាករ ខេត្តកោះកុង ២-ឈ្មោះ ម៉ៅ ទិត្យា អាយុ ៥៤ ឆ្នាំ បុគ្គលិកជាប់កិច្ចសន្យា ៣-ឈ្មោះ ពត ស្រីនាង អាយុ ៣២ ឆ្នាំ ៤-ឈ្មោះ ផល ដុល្លា អាយុ ២៧ ឆ្នាំ បុគ្គលិកធនាគារ ។ ជនសង្ស័យត្រូវបានចោទប្រកាន់ពីបទរំលោភអំណាច សមគំនិត និងសម្អាតប្រាក់។
តាមការចោទប្រកាន់ មន្ត្រីគយរូបនេះត្រូវបានគេរាយការណ៍ថា បានឈរជើងនៅចំណុចអណ្តូងទឹក ស្ថិតតាមបណ្តោយផ្លូវជាតិលេខ ៤៨ ក្នុងស្រុកបូទុមសាគរ ខេត្តកោះកុង ដោយប្រើទីតាំងត្រួតពិនិត្យមិនផ្លូវការ និងធ្វើសកម្មភាពឃាត់រថយន្តដឹកទំនិញគ្រប់ប្រភេទ ដើម្បីទាមទារប្រាក់ពីអ្នកដឹកជញ្ជូន។
ប្រភពពីពលរដ្ឋ និងអ្នករកស៊ីដឹកទំនិញ បានអះអាងថា មានការទាមទារប្រាក់ចាប់ពីចំនួនតិចដល់ច្រើន ដោយមិនគិតថាទំនិញមានពន្ធ ឬគ្មានពន្ធ។ ករណីខ្លះ ពលរដ្ឋត្រូវបង្ខំចិត្តបង់ប្រាក់ ដើម្បីជៀសវាងការខូចខាតទំនិញ ឬការពិបាកក្នុងការដឹកជញ្ជូនបន្ត។
អ្នកដឹកទំនិញ និងពលរដ្ឋមួយចំនួន បានផ្ដិតមេដៃដាក់ពាក្យប្ដឹងទៅអាជ្ញាធរ ដើម្បីស្នើឱ្យចាត់វិធានការតាមច្បាប់ និងបញ្ឈប់សកម្មភាពដែលត្រូវបានចោទថា ធ្វើឱ្យពួកគេរងការលំបាកក្នុងការរកស៊ី។ បច្ចុប្បន្ន សំណុំរឿងនេះកំពុងស្ថិតក្រោមការចាត់ចែងរបស់តុលាការ ដើម្បីបន្តនីតិវិធីតាមច្បាប់។
