បើយោងតាមលោកស្រី ខារ៉ូលីន លីវីត អ្នកនាំពាក្យសេតវិមានបាននិយាយថា ជាផ្នែកមួយនៃប្រតិបត្តិការយោធាប្រឆាំងនិងអ៊ីរ៉ង់ យោធាសហរដ្ឋអាម៉េរិកបានវាយប្រហារគោលដៅជាង ៧ ៨០០កន្លែង ដោយបំផ្លាញកប៉ាល់របស់អ៊ីរ៉ង់ជាង ១២០គ្រឿង។ នេះបើយោងតាមការចេញផ្សាយដោយសារព័ត៌មាន Tass។
លោកស្រីបានថ្លែងនៅក្នុងបទសម្ភាសន៍ជាមួយ Fox News ថា “ឥឡូវនេះយើងពិតជាបានវាយប្រហារគោលដៅជាង ៧ ៨០០កន្លែង រួមទាំងកប៉ាល់កងទ័ពជើងទឹករបស់អ៊ីរ៉ង់ជាង ១២០គ្រឿងដែលពេលនេះកំពុងតែស្ថិតនៅបាតសមុទ្រ”។
គួរបញ្ជាក់ថា សហរដ្ឋអាម៉េរិក និងអ៊ីស្រាអែលបានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់កាលពីថ្ងៃទី២៨ ខែកុម្ភៈ។ ទីក្រុងធំៗរបស់អ៊ីរ៉ង់ រួមទាំងទីក្រុងតេហេរ៉ង់ ក៏ត្រូវបានវាយប្រហារផងដែរ។ សេតវិមានបានចាត់ទុកការវាយប្រហារនេះថាសុចរិត ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែររបស់អ៊ីរ៉ង់។ កងឆ្មាំបដិវត្តន៍អ៊ីស្លាមបានប្រកាសពីប្រតិបត្តិការសងសឹក ដោយកំណត់គោលដៅទីតាំងនានានៅក្នុងប្រទេសអ៊ីស្រាអែល។ ចំណែកមូលដ្ឋានយោធាអាម៉េរិកនៅបារ៉ែន ហ្ស៊កដានី គុយវ៉ែត កាតា អារ៉ាប៊ីសាអូឌីត និងអារ៉ាប់រួមក៏ត្រូវបានវាយប្រហារផងដែរ។ មេដឹកនាំកំពូល អាយ៉ាតូឡា អាលី ខាមេនី និងមេដឹកនាំអ៊ីរ៉ង់សំខាន់ៗមួយចំនួនទៀត ត្រូវបានសម្លាប់នៅក្នុងការវាយប្រហាររួមគ្នារវាងសហរដ្ឋអាម៉េរិក និងអ៊ីស្រាអែល៕
