ប្រធានាធិបតីអាម៉េរិក លោក ដូណាល់ ត្រាំ អះអាងថា លោកមិនខ្វល់ខ្វាយពីរឿងរង្វាន់ណូបែលសន្តិភាពទៀតនោះទេ ខណៈជម្លោះជាមួយអ៊ីរ៉ង់អាចធ្វើឱ្យលោកបាត់បង់ឱកាសទទួលបានពានរង្វាន់ពិសេសមួយនេះ។ នេះបើយោងតាមការចេញផ្សាយដោយសារព័ត៌មាន The Independent។
បញ្ហាជម្លោះនៅមជ្ឈិមបូព៌ាបានរីករាលដាលកាន់តែខ្លាំង ដោយសារការវាយប្រហាររបស់អាម៉េរិក លើអ៊ីរ៉ង់ បាននាំឱ្យមានសំណួរជាច្រើនទាក់ទងនឹងពានរង្វាន់ណូបែលសន្តិភាពដែលលោក ត្រាំ ធ្លាប់ជាបេក្ខជនម្នាក់។ ជាមួយវិបត្តិបច្ចុប្បន្ន លោក ត្រាំ ក៏ហាក់លែងខ្វាយខ្វល់ជាមួយពានរង្វាន់នេះទៀតដែរ។
ក្នុងបទសម្ភាសកាលពីថ្ងៃទី១២ ខែមីនា លោក ត្រាំ អះអាងថា លោក មិនខ្វល់ជម្លោះជាមួយអ៊ីរ៉ង់ប៉ះពាល់ដល់ឱកាសរបស់លោកក្នុងការទទួលបានរង្វាន់ណូបែលឬអត់នោះទេ។ លោកបានបញ្ជាក់ថា “លោកមិនដឹងទេ។ ហើយលោកលែងខ្វល់ទៀតហើយ”។
គួរបញ្ជាក់ថា ការថ្លែងនេះបានកើតឡើងក្នុងពេលមានការរិះគន់កាន់តែខ្លាំងចំពោះអាម៉េរិកទាក់ទងនឹងជម្លោះជាមួយអ៊ីរ៉ង់ បន្ទាប់ពីការវាយប្រហារជាមុនរបស់អាម៉េរិក និងអ៊ីស្រាអែលកាលពីថ្ងៃទី២៨ ខែកុម្ភៈ៕
