ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា ការប្រឆាំងព័ត៌មានក្លែងក្លាយសម្រាប់អ្នកសារព័ត៌មាន ដំណាក់កាលទី២ នឹងរួមចំណែកបង្កើនការយល់ដឹងដល់សាធារណជន អំពីគ្រោះថ្នាក់និងផលប៉ះពាល់នៃព័ត៌មានក្លែងក្លាយ ដើម្បី ទប់ស្កាត់ការផ្សព្វផ្សាយព័ត៌មានមិនពិត ដែលជះឥទ្ធិពលអាក្រក់ដល់សន្តិសុខសង្គម និងការយល់ដឹងរបស់ប្រជាពលរដ្ឋ។
ក្នុងពិធីបើកសម្ពោធការអនុវត្តគម្រោងមេគង្គ-ឡានឆាង នៃក្រសួងព័ត៌មាន យុទ្ធនាការលុបបំបាត់ព័ត៌មានក្លែងក្លាយ៖ ពង្រឹងកិច្ចខិតខំប្រឹងប្រែង ប្រយុទ្ធប្រឆាំងព័ត៌មានបំភ្លៃ បន្ទាប់ពីការអនុវត្តគម្រោងស្តីពី ការប្រឆាំងព័ត៌មានក្លែងក្លាយសម្រាប់អ្នកសារព័ត៌មាន ដំណាក់កាលទី២ នៅរសៀល ថ្ងៃទី១២ ខែមីនា ឆ្នាំ២០២៦ នាទីស្តីការក្រសួង ឯកឧត្តម នេត្រ ភក្ត្រា បានមានប្រសាសន៍ថា គម្រោងយុទ្ធនាការលុបបំបាត់ព័ត៌មានក្លែងក្លាយ ដំណាក់កាលទី២នេះ មានលក្ខណៈខុសប្លែកពីយុទ្ធនាការនិយាយថាទេ ចំពោះព័ត៌មានក្លែងក្លាយ ដែលក្រសួងព័ត៌មានបានចាប់ផ្តើមអនុវត្តន៍ ចាប់តាំងពីខែមេសា ឆ្នាំ២០២៥មក។ ឯកឧត្តមរដ្ឋមន្ត្រីបញ្ជាក់ថា ដំណាក់កាលទី២នេះ គឺធ្វើជាលក្ខណៈតំបន់ដោយមានការចូលរួមពីប្រទេសឡាវ វៀតណាម មីយ៉ាន់ម៉ា រួមជាមួយសាធារណរដ្ឋប្រជាមានិតចិន ដែលជាប្រទេសម្ចាស់ជំនួយក្នុងការអនុវត្តគម្រោងនេះ។
ឯកឧត្តម បានបន្តថា យុទ្ធនាការនេះ បានបន្ស៊ីគ្នាទៅនឹងផែនការយុទ្ធសាស្ត្រ អភិវឌ្ឍន៍វិស័យព័ត៌មាននិងសោតទស្សន៍ឆ្នាំ២០២៥-២០២៨ របស់ ក្រសួងព័ត៌មាន ដែលផ្តល់អាទិភាពចម្បងក្នុងការរួមចំណែកលើការថែរក្សាសន្តិភាព ស្ថិរភាពនយោបាយ តាមរយៈការគ្រប់គ្រងសណ្តាប់ធ្នាប់ ក្នុងវិស័យព័ត៌មាន លំហព័ត៌មាន សន្តិសុខព័ត៌មាន និងការពង្រឹងការទូតព័ត៌មាន ដើម្បីលើកកម្ពស់កិច្ចសហប្រតិបត្តិការនៅក្នុងតំបន់និងលើ សកលលោក សំដៅផ្តល់ផលប្រយោជន៍ឱ្យគ្នាទៅវិញទៅមក។ ជាពិសេសការរៀបចំយុទ្ធនាការនេះ សមស្របទៅនឹងបម្រែបម្រួលចរន្តនយោបាយ សកលលោកដែលប្រព័ន្ធផ្សព្វផ្សាយកំពុងដើរតួនាទីសំខាន់ជាងពេលណាទាំងអស់ក្នុងការផ្តល់ព័ត៌មានពិតទៅដល់សាធារណជននិងជាស្ពាន តភ្ជាប់ ទំនាក់ទំនងរវាងប្រជាជននិងប្រជាជននៃបណ្តាប្រទេសនៅក្នុងតំបន់និងសកលលោក សំដៅកសាងសន្តិភាពនិងវិបុលភាពរួមគ្នា។
ឯកឧត្តម បានបញ្ជាក់ថា តាមការគ្រោងទុក ក្រសួងព័ត៌មាននឹងចាប់ផ្តើមបើកយុទ្ធនាការលុបបំបាត់ព័ត៌មានក្លែងក្លាយដំណាក់កាលទី២ ជាផ្លូវការ នូវខែឧសភា ឆ្នាំ២០២៦នេះ។
សំឡេង « តាមរយៈយុទ្ធនាការនេះ យើងរំពឹងថាវានឹងរួម ចំណែកបង្កើនការយល់ដឹងដល់សាធារណជនទាំងនៅក្នុងប្រទេស ទាំងនៅក្នុងតំបន់ អំពីគ្រោះថ្នាក់ និងផលប៉ះពាល់នៃព័ត៌មានក្លែងក្លាយ តាមរយៈសារជាសំឡេង និងសារជាអក្សរដែលបានបង្ហាញនៅ ក្នុងយុទ្ធនាការនិងតាមរយៈ ប្រព័ន្ធផ្សព្វផ្សាយគ្រប់ទម្រង់ និងគ្រប់មធ្យោបាយ ដែលមកពីប្រទេសចូលរួម និងតាមរយៈវេទិកាពិភាក្សាស្តីពីការទប់ស្កាត់ការរីករាលដាល នៃព័ត៌មានក្លែងក្លាយក្នុងប្រទេស និងឆ្លងដែន។
ឯកឧត្តម នេត្រ ភក្ត្រា បានឱ្យដឹងទៀតថា យុទ្ធនាការនេះនឹងជួយកាត់បន្ថយអក្ខរកម្មព័ត៌មានក្នុងចំណោមប្រជាពលរដ្ឋ លើកកម្ពស់គុណភាព ព័ត៌មាន និងពង្រឹងសមត្ថភាពប្រព័ន្ធផ្សព្វផ្សាយក្នុងការស្រាវជ្រាវ និងផ្ទៀងផ្ទាត់ព័ត៌មាន។ តាមរយៈយុទ្ធនាការនេះ ក្រុមយុវជនស្ម័គ្រចិត្តក្នុងការ ប្រឆាំងព័ត៌មានក្លែងក្លាយ នៅក្នុងតំបន់ នឹងត្រូវបានបង្កើតឡើងដើម្បីចូលរួមទប់ស្កាត់ព័ត៌មានក្លែងក្លាយ។ ដូច្នេះយុទ្ធនាការនេះ មិនត្រឹមតែ បង្រៀនពលរដ្ឋម្នាក់ៗឱ្យស្គាល់ព័ត៌មានក្លែងក្លាយប៉ុណ្ណោះទេ ថែមទាំងបានបណ្តុះគាត់ ឱ្យក្លាយជាភ្នាក់ងារទប់ស្កាត់ព័ត៌មានក្លែងក្លាយទៀតផង៕
