ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដឹកនាំគណៈប្រតិភូត្រឡប់មកមាតុភូមិវិញដោយសុវត្ថិភាព នាព្រលប់ថ្ងៃទី១៤ ខែកុម្ភៈ ឆ្នាំ២០២៦ បន្ទាប់ពីបំពេញទស្សនកិច្ចប្រកបដោយជោគជ័យ នៅសាធារណរដ្ឋតួកគីយ៉េ ចាប់ពីថ្ងៃទី៩ ខែកុម្ភៈ ឆ្នាំ២០២៦។
ដំណើរទស្សនកិច្ចនេះ ឆ្លុះបញ្ចាំងពីឆន្ទៈដ៏មុតមាំរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ក្នុងការបន្តពង្រឹង និងថែរក្សាមរតកកិច្ចសហប្រតិបត្តិការល្អក្នុងវិស័យមហាផ្ទៃ ជាមួយសាធារណរដ្ឋតួកគីយ៉េ។
ក្នុងអំឡុងទស្សនកិច្ច ឯកឧត្តម ស សុខា បានជួបពិភាក្សាការងារជាមួយ ឯកឧត្តម Mehmet Saglam អនុរដ្ឋមន្ត្រី តំណាងរដ្ឋមន្ត្រីក្រសួងមហាផ្ទៃតួកគីយ៉េ និងបានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការបណ្តុះបណ្តាលលើការអនុវត្តច្បាប់ រវាងប្រទេសទាំងពីរ។
ភាគីទាំងពីរ បានឯកភាពជំរុញការផ្លាស់ប្តូរបទពិសោធក្នុងការបង្ក្រាបអំពើឆបោកតាមប្រព័ន្ធបច្ចេកវិទ្យា ការស្រាវជ្រាវ ការចាប់ និងបញ្ជូនជនល្មើស ព្រមទាំងការគាំទ្រផ្នែកបណ្តុះបណ្តាល ដោយភាគីតួកគីយ៉េ នឹងផ្តល់អាហារូបករណ៍បន្ថែមជូនក្រសួងមហាផ្ទៃកម្ពុជា។ ភាគីទាំងពីរក៏បានពិភាក្សាអំពីការពង្រីកកិច្ចសហប្រតិបត្តិការលើវិស័យពាណិជ្ជកម្ម ទេសចរណ៍ និងការសម្រួលតម្លៃទិដ្ឋាការ។
លើសពីនេះ ឯកឧត្តម ស សុខា បានជួបថ្នាក់ដឹកនាំបណ្ឌិត្យសភានគរបាលតួកគីយ៉េ ពិភាក្សាអំពីការចែករំលែកបទពិសោធ និងបានជួបសិក្ខាកាមកម្ពុជាចំនួន ១៨ រូប ដែលកំពុងសិក្សានៅទីនោះ ដើម្បីលើកទឹកចិត្តឲ្យខិតខំរៀនសូត្រ និងយកចំណេះដឹងមកបម្រើជាតិ។
ក្នុងដំណើរទស្សនកិច្ចដដែល គណៈប្រតិភូកម្ពុជា ក៏បានសិក្សាឈ្វេងយល់អំពីការប្រើប្រាស់បច្ចេកវិទ្យាឌីជីថល ក្នុងការអភិវឌ្ឍសម្ភារ និងមធ្យោបាយការងារនគរបាលជាតិ ព្រមទាំងបានអញ្ជើញចូលទស្សនកិច្ចនៅស្ថានឯកអគ្គរាជទូតកម្ពុជា ប្រចាំសាធារណរដ្ឋតួកគីយ៉េ ផងដែរ។
