កណ្តាល ៖ ក្រោយពីមានការចែកចាយពាសពេញបណ្តាញសង្គម នាព្រឹកថ្ងៃទី០២ ខែមេសា ឆ្នាំ២០២៥នេះ ករណីផ្សាយថា មានក្រុមនគរបាលចរាចរណ៍ បានប្តូរទីតាំងរើបារ៉ាស ដោយមិនទាន់ចប់ម៉ោង ដោយសារមានបញ្ហាពេលកំពុងអនុវត្តច្បាប់ចរាចរណ៍ លោកស្នងការនគរបាលខេត្តកណ្តាល បានចេញបទបញ្ជាឲ្យកម្លាំងជំនាញស្រាវជ្រាវករណីនេះភ្លាមៗផងដែរ ។
បើតាមសេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានអោយដឹងថា លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាកម្លាំងជំនាញចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះដែលបានកើតឡើងនៅព្រឹកថ្ងៃទី២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ។
ការចុះឲ្យស្រាវជ្រាវករណីនេះ បន្ទាប់ពីឃើញគណនីហ្វេសប៊ុកឈ្មោះ Lay Kongkea បានបង្ហោះវីដេអូ សកម្មភាពមន្ត្រីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក ដោយបាននិយាយថា “នៅពេលស្ទាក់រថយន្តគាត់មានបញ្ហាចាប់ផ្តើមរើបារ៉ាសដោយមិនទាន់ចប់ម៉ោង” ។
សូមជម្រាបថា មានរថយន្ត ០២គ្រឿងបុកគ្នាពីក្រោយ ដោយសារមាន នគរបាលចរាចរណ៍ ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោកចេញមកស្ទាក់ បណ្តាលអោយកើតមានគ្រោះថ្នាក់ចរាចរណ៍តែម្តង ខណៈដែលកើតមានរឿងភ្លាមៗ កម្លាំងនគរបាលចាប់ផ្តើមរើបារ៉ាស់ ដោយមិនទាន់ចប់ម៉ោងការងារចេញទៅបាត់តែម្តង ។
ហេតុការណ៍នេះកើតឡើងនៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ។
បើតាមការបញ្ជាក់ពីពលរដ្ឋ ដែលបង្ហោះវីដេអូនោះ បានលើកឡើងថា មូលហេតុមុនកើតមានគ្រោះថ្នាក់ចរាចរណ៍ គឺ មន្ត្រីនគរបាលចរាចរណ៍ ដែលឈរពួនស្ទាក់នៅផ្លូវជាតិលេខ៣ បានស្ទុះចេញមកឃាត់រថយន្តម៉ាកហ្វ៊ត ពណ៌ខ្មៅមួយគ្រឿង ដែលកំពុងបើកបរត្រឹមត្រូវតាមល្បឿនកំណត់ ពេលនោះ ម្ចាស់រថយន្តក៏បានជាន់ហ្វ្រាំងភ្លាមៗ ស្រាប់តែមានរថយន្ដមួយគ្រឿងទៀត បើកមកបុករថយន្តម៉ាកហ្វ៊ត ពីក្រោយ ។ នៅពេលឃើញហេតុការណ៍គ្រោះថ្នាក់ចរាចរណ៍បែបនេះ កម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះ មិនបាន ចុះវាស់វែងដើម្បីរកដំណោះស្រាយអោយប្រជាពលរដ្ឋទេ បែរជានាំគ្នារើបារ៉ាស ហើតបើករថយន្តគេចចេញពីគោលដៅអស់តែម្ដង ។
ប្រភពដដែលបន្តថា នៅពេលស្ទាក់រថយន្តគាត់ មានបញ្ហាចាប់ផ្តើមរើបារាំសដោយមិនទាន់ចប់ម៉ោង។ ហើយទង្វើ របស់មន្ត្រីនគរបាលចរាចរណ៍ទាំងនោះ ត្រូវបានមហាជនរិះគន់យ៉ាងខ្លាំង លើបណ្ដាញសង្គម ។
រហូតមកដល់រសៀលថ្ងៃដដែលនេះ លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល លោកបានបញ្ជាអោយកម្លាំងជំនាញ ចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ពាក់ព័ន្ធ ក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះហើយ ៕
