លោក ណុប សុភក្រ័ ស្មៀនឃុំលំចង់ ស្រុកសំរោង ខេត្តតាកែវ កំពុងក្លាយជាប្រធានបទក្តៅ បន្ទាប់ពីត្រូវបានស្ត្រីម្នាក់ដាក់ពាក្យប្តឹង ពាក់ព័ន្ធការលួងលោមផ្លូវភេទ និងបទប៉ុនប៉ងរំលោភសេពសន្ថវៈ។
យោងតាមរបាយការណ៍របស់រដ្ឋបាលសាលាស្រុកសំរោង បានបញ្ជាក់ថា កាលពីដំបូង ស្ត្រីឈ្មោះ អ៊ួង ម៉ារ៉ាឌី ដែលជាមិត្តភក្តិ បានខ្ចីប្រាក់ពីលោកស្មៀនចំនួន ១០ ដុល្លារ ហើយបន្តខ្ចីថែម ៣០ ដុល្លារ សរុប ៤០ ដុល្លារ។ ទោះជាយ៉ាងណា លោកស្មៀនត្រូវបានចោទថា មិនព្រមទទួលប្រាក់សងវិញទេ ប៉ុន្តែបានស្នើឲ្យស្ត្រីរូបនោះដេកជាមួយជំនួសវិញ។
របាយការណ៍ដដែលបន្តថា ស្ត្រីខាងលើមិនព្រម និងបានឲ្យប្តីដាក់ពាក្យប្តឹងទៅសាលាស្រុកសំរោង ដែលក្រោយមកមានការសម្របសម្រួល ដោយភាគីប្តីស្ត្រីព្រមទទួលសំណងចំនួន ២ លានរៀល ដើម្បីបញ្ចប់រឿង។ ប៉ុន្តែបន្ទាប់មក ស្ត្រីរងគ្រោះបានបន្តដាក់ពាក្យប្តឹងទៅអធិការដ្ឋាននគរបាលក្រុងដូនកែវ ដែលនគរបាលបានបញ្ជូនសំណុំរឿងទៅការិយាល័យប្រឆាំងការជួញដូរមនុស្ស និងអនីតិជន នៃស្នងការដ្ឋាននគរបាលខេត្តតាកែវ។
ពាក់ព័ន្ធករណីនេះ លោក ទេព ថន ប្រធានការិយាល័យប្រឆាំងការជួញដូរមនុស្ស និងអនីតិជន នៃស្នងការដ្ឋាននគរបាលខេត្តតាកែវ បានបញ្ជាក់ថា ស្ត្រីឈ្មោះ អ៊ួង ម៉ារ៉ាឌី បានទារសំណងចំនួន ៤,០០០ ដុល្លារ ហើយសំណុំរឿងនឹងត្រូវបញ្ជូនទៅសាលាដំបូងខេត្តតាកែវ នៅសប្តាហ៍ក្រោយ ដោយចោទប្រកាន់ពីបទ ប៉ុនប៉ងរំលោភសេពសន្ថវៈ។
ក្រៅពីករណីខាងលើ លោក ណុប សុភក្រ័ ក៏ត្រូវបានស្ត្រីម្នាក់ទៀតដាក់ពាក្យប្តឹង ពាក់ព័ន្ធការឆាតតាមកម្មវិធី Telegram លួងលោមសុំដេកជាមួយ ដោយសន្យាផ្តល់ប្រាក់ ៤០ ដុល្លារ ហើយថែមទាំងបានបាញ់ប្រាក់ជាមុនចំនួន ២០០ ដុល្លារ ទៅឲ្យស្ត្រីរងគ្រោះ មុនពេលមានការរួមភេទណាមួយកើតឡើង។
ស្ត្រីរងគ្រោះបានឲ្យដឹងថា បន្ទាប់ពីឃើញទង្វើមិនសមរម្យ នាងបានយកភស្តុតាងឆាតទៅជូនប្រពន្ធលោកស្មៀនឲ្យដឹង ប៉ុន្តែមិនទទួលបានការឆ្លើយតបណាមួយ ក្រៅតែស្នើឲ្យបាញ់ប្រាក់ត្រឡប់វិញ។ ជាហេតុនេះ នាងបានដាក់ពាក្យប្តឹងទៅអធិការដ្ឋាននគរបាលក្រុងដូនកែវ និងបន្តទៅស្នងការដ្ឋាននគរបាលខេត្តតាកែវ ដើម្បីស្វែងរកយុត្តិធម៌។
បច្ចុប្បន្ន សំណុំរឿងទាំងនេះ កំពុងស្ថិតក្រោមការចាត់ការតាមនីតិវិធីរបស់កម្លាំងជំនាញ នៃស្នងការដ្ឋាននគរបាលខេត្តតាកែវ៕
