ប្រធានអាស៊ានថ្មី ពាក់ព័ន្ធស្ថានការណ៍ព្រំដែនរវាង កម្ពុជា និង ថៃ បន្តរកដំណោះស្រាយដោយសន្តិភាព ប្រកាន់ខ្ជាប់គោលការណ៍ និងច្បាប់អន្តរជាតិ

ប្រធានអាស៊ានថ្មី បានថ្លែងអំពីស្ថានការណ៍ព្រំដែនរវាងកម្ពុជា និងថៃ ដោយលើកឡើងពីសារៈសំខាន់នៃការរក្សាសន្តិភាព ស្ថិរភាព និងការដោះស្រាយបញ្ហាតាមមធ្យោបាយសន្តិភាព ស្របតាមគោលការណ៍ និងច្បាប់អន្តរជាតិ។

ការថ្លែងនេះ ត្រូវបានធ្វើឡើងដោយលោកស្រី Ma. Theresa P. Lazaro រដ្ឋមន្ត្រីការបរទេសហ្វីលីពីន ក្នុងថ្ងៃទី២៩ ខែមករា ឆ្នាំ២០២៦ ដោយហ្វីលីពីននិងក្លាយជាប្រធានអាស៊ានថ្មី។ លោកស្រីបានបញ្ជាក់ថា អាស៊ានបន្តលើកទឹកចិត្តឲ្យភាគីពាក់ព័ន្ធទាំងពីរ ប្រើប្រាស់ការសន្ទនា និងការទូត ដើម្បីដោះស្រាយបញ្ហាព្រំដែន ដោយជៀសវាងការបង្កើនភាពតានតឹង។

លោកស្រី Ma. Theresa P. Lazaro បានអះអាងថា ការរក្សាសាមគ្គីភាព និងការជឿជាក់គ្នារវាងប្រទេសសមាជិក គឺជាគន្លឹះសំខាន់សម្រាប់សន្តិភាព និងការអភិវឌ្ឍក្នុងតំបន់អាស៊ានទាំងមូល។ លោកស្រីក៏បានបញ្ជាក់ផងដែរថា អាស៊ានត្រៀមខ្លួនរួចជាស្រេចក្នុងការគាំទ្រ និងជួយសម្របសម្រួល ប្រសិនបើមានការស្នើសុំពីភាគីពាក់ព័ន្ធ។

សេចក្តីថ្លែងការណ៍នេះ ត្រូវបានចាត់ទុកថា ជាការបង្ហាញពីតួនាទីសកម្មរបស់អាស៊ាន ក្នុងការរក្សាសន្តិភាព និងស្ថិរភាពក្នុងតំបន់ ជាពិសេសចំពោះបញ្ហាព្រំដែនរវាងប្រទេសសមាជិក។