ក្រសួងមហាផ្ទៃ បានសម្រេចអនុវត្តទណ្ឌកម្មខាងវិន័យ ដោយដកហូតមុខតំណែង បន្ថយឋានន្តរស័ក្តិ និងផ្អាកការងារបណ្តោះអាសន្ន ចំពោះមន្ត្រីនគរបាលខេត្តស្ទឹងត្រែង ចំនួន ៦រូប បន្ទាប់ពីរកឃើញថា បានល្មើសបទវិន័យនគរបាលជាតិ។
យោងតាមប្រកាសស្តីពីការអនុវត្តទណ្ឌកម្មខាងវិន័យ ចេញកាលពីថ្ងៃទី១២ ខែមករា ឆ្នាំ២០២៦ បានបញ្ជាក់ថា ឧត្តមសេនីយ៍ត្រី ចាន់ សុផា អត្តលេខ ០២០៤៦ ត្រូវបានដកហូតមុខតំណែងពីស្នងការរង ទទួលការងារព្រំដែន នៃស្នងការដ្ឋាននគរបាលខេត្តស្ទឹងត្រែង ឱ្យមកជាមន្ត្រី ដោយសារល្មើសបទវិន័យនគរបាលជាតិ។
ជាមួយគ្នានេះ វរសេនីយ៍ទោ ចាន់ សុធា អត្តលេខ ៥៦៩៤៥ មេបញ្ជាការរង វរសេនាតូចនគរបាលការពារព្រំដែនគោកលេខ៧០១ ត្រូវបានផ្អាកការងារបណ្តោះអាសន្ន ដោយមូលហេតុល្មើសបទវិន័យនគរបាលជាតិផងដែរ។
បន្ថែមពីនេះ មន្ត្រីនគរបាលចំនួន ៤រូបទៀត ត្រូវបានដកហូតមុខតំណែង និងបន្ថយឋានន្តរស័ក្តិ ចំនួន ១ថ្នាក់ រួមមាន៖
វរសេនីយ៍ត្រី ទិព្វ និទ្ធី អត្តលេខ ៥៦៩៧២ ត្រូវបន្ថយឋានន្តរស័ក្តិពីវរសេនីយ៍ត្រី មកជាអនុសេនីយ៍ឯក
អនុសេនីយ៍ឯក ឋាន វិចិត្រ អត្តលេខ ៧១៥៦៩ ត្រូវបន្ថយមកជាអនុសេនីយ៍ទោ
អនុសេនីយ៍ទោ សៅ សុភាព អត្តលេខ ៧១៦០៩ ត្រូវបន្ថយមកជាអនុសេនីយ៍ត្រី
អនុសេនីយ៍ត្រី ចាន់ សុភ័ក្រ អត្តលេខ ៩៥៧៥៣ ត្រូវបន្ថយមកជាថ្នាក់ព្រិន្ទបាលឯក
បើតាមការបញ្ជាក់ពីលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ តាមរយៈឆានែលតេលេក្រាម មន្ត្រីនគរបាលខាងលើ ត្រូវបានរកឃើញថា ជាប់ពាក់ព័ន្ធនឹងការនាំមនុស្សឆ្លងដែនដោយខុសច្បាប់។
គួរបញ្ជាក់ផងដែរថា ក្នុងចំណោមមន្ត្រីដែលត្រូវទទួលទណ្ឌកម្ម មាន ២រូបជាឪពុក និងកូនបង្កើត គឺឧត្តមសេនីយ៍ត្រី ចាន់ សុផា និងអនុសេនីយ៍ត្រី ចាន់ សុភ័ក្រ។
ការអនុវត្តទណ្ឌកម្មនេះ ត្រូវបានមើលឃើញថា ជាជំហានមួយរបស់ក្រសួងមហាផ្ទៃ ក្នុងការពង្រឹងវិន័យ ការទទួលខុសត្រូវ និងការអនុវត្តច្បាប់ឲ្យបានតឹងរឹង ក្នុងកងកម្លាំងនគរបាលជាតិ។
