សេតវិមានបញ្ជាក់ថា លោកប្រធានាធិបតី ដូណាល់ ត្រាំ កំពុងពិភាក្សាគ្នាពីវិធីសាស្ត្រផ្សេងៗដើម្បីចូលគ្រប់គ្រងកោះហ្គ្រីនលែន (Greenland) ដោយចាត់ទុកថា វាជាកិច្ចការសំខាន់បំផុតសម្រាប់សន្តិសុខជាតិអាម៉េរិក ក្នុងការទប់ស្កាត់ឥទ្ធិពលរបស់សត្រូវ នៅលើតំបន់អាក់ទិក។ សេចក្ដីថ្លែងការណ៍របស់សេតវិមាន នៅថ្ងៃអង្គារ បញ្ជាក់យ៉ាងច្បាស់ថា ការប្រើប្រាស់កម្លាំងយោធាអាម៉េរិក អាចជាជម្រើសមួយដែលលោកប្រធានាធិបតីអាចប្រើប្រាស់បានគ្រប់ពេល ។
បំណងចង់បានកោះហ្គ្រីនឡែននេះ បានផ្ទុះឡើងជាថ្មីបន្ទាប់ពីកងទ័ពអាម៉េរិកទើបតែបានចាប់ខ្លួនប្រធានាធិបតីវេណេហ្ស៊ូអ៊ីឡា លោក នីកូឡាស ម៉ាឌូរ៉ូ កាលពីចុងសប្តាហ៍មុន។ ទោះបីជាគំនិតនេះធ្លាប់បានលើកឡើងតាំងពីឆ្នាំ ២០១៩ ក៏ដោយ ប៉ុន្តែបច្ចុប្បន្នវាជាអាទិភាពមួយក្នុងចំណោមគោលដៅនយោបាយការបរទេសសំខាន់ៗរបស់មេដឹកនាំអាម៉េរិក ។
ទោះជាយ៉ាងណាក៏ដោយ គម្រោងនេះកំពុងត្រូវបានប្រឆាំងយ៉ាងខ្លាំងពីសំណាក់ថ្នាក់ដឹកនាំកោះហ្គ្រីនលែន ដែលលើកឡើងម្ដងហើយម្ដងទៀតថា ពួកគេមិនចង់ក្លាយជាផ្នែកមួយរបស់អាម៉េរិកឡើយ។ ប្រទេសដាណឺម៉ាក កាណាដា និងសម្ព័ន្ធមិត្តអឺរ៉ុបផ្សេងទៀត ក៏បានចេញមកការពារកោះនេះផងដែរ ដោយគេបារម្ភថា ប្រសិនបើអាម៉េរិកហ៊ានប្រើកម្លាំងបាយដណ្ដើមយកទឹកដីពីសម្ព័ន្ធមិត្តណាតូ (NATO) របស់ខ្លួនមែននោះ វានឹងបង្កជាវិបត្តិការទូតដ៏ធ្ងន់ធ្ងរបំផុតក្នុងប្រវត្តិសាស្ត្រ ៕
