អភិបាលខេត្តកំពង់ស្ពឺ ឯកឧត្តម ជាម ចន្ទ័សោភ័ណ បានដឹកនាំប្រតិភូថ្នាក់ខេត្ត និងសប្បុរសជននានាចុះទៅតាមបណ្តាខេត្តចំនួន៤ស្ថិតនៅតាមបណ្តោយព្រំដែនដែលមានជម្លោះ ដើម្បីសំណេះសំណាលជាមួយជនភៀសសឹកកំពុងស្នាក់នៅក្នុងជំរុំជនភៀសខ្លួននិងផ្តល់អំណោយដើម្បីទ្រទ្រង់ជីវភាពប្រចាំថ្ងៃ។ ដំណើរបេសកកម្មមនុស្សធម៌របស់រដ្ឋបាលខេត្តកំពង់ស្ពឺបានធ្វើឡើងរយៈពេល៣ថ្ងៃលើខេត្តព្រះវិហារ សៀមរាប ឧត្តរមានជ័យនិង បន្ទាយមានជ័យ ។
ឯកឧត្តម ជាម ចន្ទ័សោភ័ណ បានលើកឡើងថា ខណៈដែលប្រទេសជាតិ កំពុងតែមានជម្លោះព្រំដែន ប្រជាពលរដ្ឋរាប់ម៉ឺនគ្រួសារត្រូវបានជម្លៀសចេញពីផ្ទះសម្បែងទៅរកទីទួលសុវត្ថិភាព។ក្នុងដំណាក់កាលនោះ ជនភៀសសឹកទាំងអស់មិនអាចរកទទួលទានបាននោះទេ ដូច្នេះក្នុងនាមស្មារតី(ខ្មែរជួយខ្មែរ ខ្មែរស្រឡាញ់ខ្មែរ ) ប្រជាពលរដ្ឋនៅទូទាំងប្រទេស ពិសេសប្រជាពលរដ្ឋអ្នកខេត្តកំពង់ស្ពឺបានចូលរួមយ៉ាងសស្រាក់សស្រាំនូវធនធានផ្ទាល់ខ្លួនដើម្បីជួយទ្រទ្រង់ដល់ការហូបចុកប្រចាំថ្ងៃរបស់បងប្អូនជនភៀសសឹកដែលរស់បាននិងកំពុងស្នាក់នៅតាមជំរុំភៀសខ្លួន។
ក្រោមកម្លាំងសាមគ្គីជាតិខ្មែរ ប្រជាពលរដ្ឋ សប្បុរសជននានាបានរួមសហការគ្នានាំយកនូវថវិកា អង្ករ ទឹកសុទ្ធ និងភេសជ្ជៈមកជូនដល់រដ្ឋបាលខេត្តកំពង់ស្ពឺជាបន្តបន្ទាប់ ដើម្បីឱ្យរដ្ឋបាលខេត្តមានលទ្ធភាពធ្វើជាភស្តុភារសមរភូមិក្រោយ បន្តនាំយកទៅជួយដល់សមរភូមិមុខនិងដល់ដៃពលរដ្ឋនៅក្នុងជំរំភៀសសឹក និងវីរកងទ័ពជួរមុខ។
នៅក្នុងជំនួបជាមួយបងប្អូនជនភៀសសឹកនៅតាមជំរុំភៀសខ្លួន អភិបាលខេត្តកំពង់ស្ពឺ ឯកឧត្តម ជាម ចន្ទ័សោភ័ណ បានគាំទ្រជំហរដ៏មោះមុត និងច្បាស់លាស់របស់ សម្តេចធិបតី ហ៊ុន ម៉ាណែត ដែលបានគូសបញ្ជាក់ថា ការអនុវត្តបទឈប់បាញ់មិនមែនជាការចុះចាញ់ ឬយកបូរណភាពទឹកដី និង អធិបតេយ្យជាតិ ទៅដោះដូរយកសន្តិភាពនោះឡើយ ដោយសង្កត់ធ្ងន់ថា ខ្សែបន្ទាត់ព្រំដែនអន្តរជាតិរវាងកម្ពុជា-ថៃ នៅតែកំណត់ដោយសន្ធិសញ្ញា និងអនុសញ្ញាអន្តរជាតិមានស្រាប់ ដែលកម្ពុជានៅតែរក្សាបានសិទ្ធិពេញលេញក្នុងការ ដោះស្រាយបញ្ហាព្រំដែនអនុលោមតាមច្បាប់អន្តរជាតិ សន្ធិសញ្ញា អនុសញ្ញា និងយន្តការទ្វេភាគីជាធរមាន ទាំងឡាយ។ការអនុវត្តបទឈប់បាញ់បានធ្វើឱ្យសភាពការណ៍តាមបន្ទាត់ព្រំដែនមានភាពស្ងប់ស្ងាត់ ពលរដ្ឋភៀសសឹកខ្លះបានចាកចេញពីជំរុំ ហើយវិលត្រឡប់ទៅលំនៅដ្ឋានវិញបណ្តើរៗ។
នៅក្នុងឱកាសនោះផងដែរ អភិបាលខេត្តកំពង់ស្ពឺបានលើកឡើងថា បងប្អូនពិតជាប្រឹងប្រែងក្នុងការអត់ធ្មត់ជាមួយរាជរដ្ឋាភិបាលក្នុងការស្វែងរកសុខសន្តិភាពមកជូនប្រទេសជាតិវិញ និងបានជឿជាក់លើវីរភាពរបស់វីរកងទ័ពយើងក្នុងការឈរយ៉ាងរឹងមាំក្នុងការការពារបូរណភាពទឹកដីនិងអធិបតេយ្យភាពជាតិ។ភាពអត់ធ្មត់និងការជឿជាក់របស់បងប្អូនលើថ្នាក់ដឹកនាំ ពិសេសលើសម្តេចធិបតី ហ៊ុន ម៉ាណែត ក្នុងការដោះស្រាយជម្លោះព្រំដែនពិតជាត្រឹមត្រូវនិងច្បាស់លាស់ ជម្លោះត្រូវបានដោះស្រាយបញ្ចប់នាំមកនូវបទឈប់បាញ់ វីរកងទ័ពចំនួន១៨នាក់ដែលកងទ័ពសៀមចាប់ទៅ ត្រូវបានដោះលែងឱ្យវិលត្រឡប់មកកាន់មាតុប្រទេសខ្លួន ជួបជុំគ្រួសារវិញផងដែរ៕
