លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា នៅព្រឹកថ្ងៃទី១៧ ខែធ្នូនេះ បានអញ្ជើញចូលជាអធិបតីក្នុងកម្មវិធី ចលនា “យើងរួមគ្នាដើម្បីជាតិ” ស្ថិតនៅសាលាបឋមសិក្សាភ្នំពេញថ្មី រាជធានីភ្នំពេញ ដោយមានការចូលរួមពីសមាជិកសមាជិកាកាយឫទ្ធិនារីកម្ពុជា និងគ្រូ អ្នកគ្រូ សិស្សានុសិស្សចូលរួមដំាបន្លែបង្ការនៅក្នុងបរិវេនសាលារៀន។
នៅក្នុងពិធីនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានថ្លែងថា បន្ទាប់ពីប្រទេសថៃ បានចូលឈ្លានពានទឹកដីប្រទេសកម្ពុជា បានធ្វើឲ្យពលរដ្ឋខ្មែរនៅជាប់ព្រំដែនជាបន្តបន្ទាប់ ត្រូវបង្ខំចិត្តចាកចេញពីផ្ទះសំបែង ដែលធ្វើឲ្យចំនួនជនភៀសសឹកមានការកើនឡើងពីមួយថ្ងៃទៅមួយថ្ងៃ។
ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងផ្គង់ផ្គង់ស្បៀងអាហារដល់ជនភៀសសឹក និងវីរកងទ័ពកម្ពុជា ទើបលោកជំទាវ បានណែនាំឲ្យសាខាកាយឫទ្ធិនារីកម្ពុជាទាំងអស់ បំផុសបំផុលសកម្មភាពធ្វើការចាប់ផ្តើមដាំបន្លែនៅតាមសាលារៀន វត្តអារាម និងសហគមន៍ ដើម្បីយកបន្លែទាំងអស់នេះទៅសមរភូមិជួរមុខ និងជនភៀសសឹក។ លើសពីនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានលើកទឹកចិត្តដល់សិស្សានុសិស្សដែលបានចូលរួមដាំបន្លែនៅសាលាបឋមសិក្សាភ្នំពេញ ថ្មី ត្រូវចូលថែទាំបន្លែឲ្យបានល្អ។
លោកគ្រូ និងសិស្សនៅសាលាបឋមសិក្សាភ្នំពេញថ្មី បានប្តេជ្ញាថែទាំបន្លែបង្កាឲ្យបានដិតដល់ ដូចជាស្រោចទឹក និងដាក់ជី ដើម្បីឆាប់ធំយកទៅចែកជូនដល់ទ័ពកម្ពុជា និងជនភៀសសឹក។ សាលាបឋមសិក្សាភ្នំពេញថ្មី មានបន្លែបង្ការជាច្រើនប្រភេទដែលអាចឆាប់ប្រមូលផលបានក្នុងនោះមានដូចជា៖ត្រកួន ស្បៃតឿ ស្បៃជើងទា និងសាឡាត់ជាដើម។
គួរបញ្ជាក់ដែរថា ចលនា “យើងរួមគ្នាដើម្បីជាតិ” ផ្តួចផ្តើមគំនិដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា ក្នុងគោលបំណងផុសសកម្មភាពដាំបន្លែដែលអាចឆាប់ប្រមូលផលបាន នៅតាមសាលារៀន ផ្ទះសំបែង វត្តអារាម និងដីសហគមន៍ សំដៅកសាងកសិផលជាតិ ដើម្បីទ្រទ្រង់ដល់វីរកងទ័ព វីរនគលបាលជួរមុខការពាព្រំដែន និងជនភៀសសឹកដោយសារការឈ្លានពានពីប្រទេសថៃ៕
