នៅព្រឹកថ្ងៃសុក្រទី២៨ ខែវិច្ឆិកា ឆ្នាំ២០២៥ ឯកឧត្តម ឧត្តមអគ្គានុរក្ស ថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារសម្រាប់ឆ្នាំ២០២៦ របស់អគ្គនាយកដ្ឋានពន្ធនាគារ ដោយមានការអញ្ជេីញចូលរួមពី លោក លោកស្រី អគ្គនាយករង ប្រធាននាយកដ្ឋានជំនាញ ប្រធានមណ្ឌលអប់រំកែប្រែ ពន្ធនាគារ រាជធានី ខេត្ត លោក លោកស្រីជាថ្នាក់ដឹកនាំ តំណាងអង្គភាព ស្ថាប័នពាក់ព័ន្ធ និងមន្ត្រីជំនាញគ្រប់លំដាប់ថ្នាក់ នៃអគ្គនាយកដ្ឋានពន្ធនាគារជាច្រេីនរូបទៀត ។
ថ្លែងក្នុងកម្មពិធីសន្និបាតនេះផងដែរ ឯកឧត្តម អគ្គនាយក បានមានប្រសាសន៍ កោតសរសេីរ និងវាយតំលៃខ្ពស់ ដល់លោក លោកស្រី អគ្គនាយករង ថ្នាក់ដឹកនាំ និងមន្ត្រីជំនាញទាំងអស់ នៃអគ្គនាយកដ្ឋានពន្ធនាគារ ដែលបានខិតខំបំពេញនូវតួនាទី ភារកិច្ចរបស់ខ្លួនកន្លងមកប្រកបដោយស្មារតីការទទួលខុសត្រូវខ្ពស់ និងទទួលបានលទ្ធផលល្អប្រសេីររយៈពេលពេញ១ឆ្នាំកន្លងមកនេះ ។
ឯកឧត្តម អគ្គនាយក បានបន្ថែមថា រយៈពេល ១ឆ្នាំនេះ អគ្គនាយកដ្ឋានពន្ធនាគារ បានខិតខំសម្រេចឱ្យបាននូវទិសដៅ និងសូចនាករ ដែលបានកំណត់ក្នុងផែនការយុទ្ធសាស្ត្រ ៥ឆ្នាំ របស់ខ្លួន ដើម្បីឆ្លើយតបទៅនឹងផែនការយុទ្ធសាស្ត្ររបស់ក្រសួងមហាផ្ទៃ និងការធ្វើកំណែទម្រង់ពន្ធនាគារ។
ឯកឧត្តម អគ្គនាយក បានមានប្រសាសន៍លេីកឡេីងថា ឆ្នាំ២០២៥នេះ ជាឆ្នាំទី២ នៃការអនុវត្ត កម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានកំណត់ អាទិភាពគន្លឹះ៥ គឺមនុស្ស ផ្លូវ ភ្លើង ទឹក និងច្ចេកវិទ្យាឌីជីថល ដែលមានស្នូលនៃយុទ្ធសាស្ត្រ ៣ គឺការកែទម្រង់ ការពង្រឹង អភិបាលកិច្ច និងការធ្វើទំនើបកម្មស្ថាប័ន។
ឯកឧត្តម អគ្គនាយក បានមានប្រសាសន៍បន្ដថា នៅក្នុងក្របខ័ណ្ឌក្រសួងមហាផ្ទៃ ក្រោមការដឹកនាំរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានដាក់ចេញនូវផែនការយុទ្ធសាស្ត្រ ស្តីពីការលើកកម្ពស់ ការគ្រប់គ្រងរដ្ឋបាលដែនដី សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងនោះវិស័យពន្ធនាគារត្រូវបានកំណត់នៅក្នុងយុទ្ធសាស្ត្រទី៣ គឺការលើកកម្ពស់ការគ្រប់គ្រងពន្ធនាគារ។
ឯកឧត្តម អគ្គនាយក គូសបញ្ជាក់ថា រយៈពេល១ឆ្នាំនេះ អគ្គនាយកដ្ឋានពន្ធនាគារ បានខិតខំសម្រេចឱ្យបាននូវទិសដៅ និងសូចនាករ ដែលបានកំណត់ក្នុងផែនការយុទ្ធសាស្ត្រ៥ឆ្នាំ របស់ខ្លួនដើម្បីឆ្លើយតបទៅនឹងផែនការយុទ្ធសាស្ត្ររបស់ក្រសួងមហាផ្ទៃ និងការធ្វើកំណែទម្រង់ពន្ធនាគារ ។
ឯកឧត្តម បានមានប្រសាសន៍បញ្ជាក់បន្ថែមថាការរៀបចំសន្និបាតនាពេលនេះ គឺដើម្បីឆ្លុះបញ្ចាំង និងធានាឱ្យការបូកសរុបលទ្ធផលការងារឆ្នាំ២០២៥នេះ មានភាពពេញលេញគ្រប់ជ្រុងជ្រោយ ដែលមានការបន្ស៊ីគ្នារវាងការអនុវត្តការងារជាក់ស្តែងជាមួយនឹងផែនការសកម្មភាព និងភារកិច្ចដែលបានកំណត់ជាមូលដ្ឋានធ្វើការត្រួតពិនិត្យវាយតម្លៃ អំពីបញ្ហាប្រឈម និងការងារដែលនៅសេសសល់ដើម្បីដាក់ចេញនូវដំណោះស្រាយ និងកំណត់ទិសដៅសម្រាប់អនុវត្តនៅឆ្នាំ២០២៦ ឱ្យបានសមស្រប ។
