នៅខណៈនេះ ភាគខាងត្បូងប្រទេសថៃកំពុងប្រឈមនឹងគ្រោះធម្មជាតិដ៏ធ្ងន់ធ្ងរមួយពុំធ្លាប់មានពីមុនមក ដោយអាជ្ញាធរខេត្តសុងខ្លា (Songkla) បានប្រកាសដាក់ទីក្រុងហាតយ៉ៃ (Hatyai) និងស្រុកជុំវិញនោះជាតំបន់ពណ៌ក្រហម ហើយបញ្ជាឱ្យមានការជម្លៀសអ្នកស្រុកជាបន្ទាន់ ខណៈដែលភ្លៀងមូសុងវស្សាកំពុងធ្លាក់ខ្លាំងជាបន្តបន្ទាប់រហូតបង្កជាទឹកជំនន់យ៉ាងធ្ងន់ធ្ងរ ។
មានប្រជាពលរដ្ឋជាង ៤៦៥,០០០ នាក់ទទួលរងផលប៉ះពាល់នៅក្នុងខេត្តចំនួន៦ ប៉ុន្តែទីក្រុងហាតយ៉ៃនៃខេត្តសុងក្លា រងនូវការខាតបង់ច្រើនជាងគេ ដោយយោងតាមទិន្នន័យពីផ្កាយរណបបានបង្ហាញថា ប្រហែល ៣៦,៤៨០ ហិកតា ត្រូវទឹកជំនន់ជន់លិច ។
ទន្ទឹមនឹងនោះ ការិយាល័យនៃនាយកដ្ឋានធារាសាស្ត្ររដ្ឋរបស់ថៃ នៅដើមសប្ដាហ៍នេះ បានឱ្យដឹងថា ភ្លៀងដែលធ្លាក់ខ្លាំងលើទីក្រុងហាតយ៉ៃនាពេលថ្មីៗនេះ ជាកំណត់ត្រាភ្លៀងធ្លាក់ខ្លាំងជាងគេពុំធ្លាប់មានក្នុងរយៈពេល ៣០០ ឆ្នាំមកហើយ ដែលនាំឱ្យមានសំណួរជាច្រើនអំពីការត្រៀមលក្ខណៈរបស់តំបន់នេះសម្រាប់ព្រឹត្តិការណ៍អាកាសធាតុកាន់តែធ្ងន់ធ្ងរឡើងៗនៅពេលអនាគត ៕
