នាយឧត្តមសេនីយ៍ ស ថេត អគ្គស្នងការនគរបាលជាតិ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត នៅថ្ងៃទី២២ ខែវិច្ឆិកា ឆ្នាំ២០២៥ បានអញ្ជើញក្នុងពិធីបិទវគ្គហ្វឹកហ្វឺនជំនាញអង្គរក្សពិសេសជំនាន់ទី៣១ និងបើកវគ្គបន្តជំនាន់ទី៣២ រួមជាមួយវគ្គជំនាញពិសេស នៅមជ្ឈមណ្ឌលហ្វឹកហ្វឺនបញ្ជាការដ្ឋានអង្គរក្ស។
នាយឧត្តមសេនីយ៍ ស ថេត បានថ្លែងអំណរគុណ និងកោតសរសើរចំពោះថ្នាក់ដឹកនាំ យោធាចារ្យ គ្រូបង្រៀន និងមន្ត្រីទាំងអស់ នៃមជ្ឈមណ្ឌលហ្វឹកហ្វឺន ដែលបានបំពេញភារកិច្ចរបស់ខ្លួន ដោយស្មារតីទទួលខុសត្រូវ ឆន្ទៈមោះមុត និងការប្តេជ្ញាចិត្តខ្ពស់ ក្នុងការដឹកនាំគ្រប់គ្រង ការបណ្តុះបណ្តាល និងបង្ហាត់បង្រៀនសិក្ខាកាមបានល្អប្រសើរ ដើម្បីកសាង និងអភិវឌ្ឍ ធនធានមនុស្សថ្មី ប្រកបដោយសក្តានុពល ចំណេះដឹង ជំនាញ សមត្ថភាព ភក្តីភាព និង ក្រមសីលធម៌វិជ្ជាជីវៈ សម្រាប់បន្តវេនក្នុងវិស័យការពារជាតិ និងការពារថ្នាក់ដឹកនាំ ទាំងក្នុង ពេលបច្ចុប្បន្ន និងនាពេលអនាគត។
លោកថា កងកម្លាំងប្រដាប់អាវុធគ្រប់ប្រភេទ គឺជាឧបករណ៍របស់រដ្ឋ ដែលត្រូវតែប្រតិបត្តិតាមតួនាទី ភារកិច្ច និងបទបញ្ជា ដើម្បីបម្រើរាជរដ្ឋាភិបាលដោយស្មោះត្រង់ និងឥតងាករេ។ ហេតុនេះ ក្នុងនាមអគ្គស្នងការដ្ឋាននគរបាលជាតិ ប្តេជ្ញាចិត្ត៖ ១. ប្តេជ្ញាបន្តពង្រឹងកិច្ចសហការយ៉ាងជិតស្និតនិងរឹងមាំ ជាមួយបញ្ជាការដ្ឋានអង្គរក្ស ក្នុងការធានានិងការពារ សម្តេចទាំងទ្វេរ និង ក្រុមគ្រួសារ ប្រកបដោយសុវត្ថិភាពទាំងស្រុង នៅគ្រប់កាលៈទេសៈ, ២. ប្តេជ្ញាចិត្តរួមគ្នា ក្នុងការប្រតិបត្តិតាមបទបញ្ជារបស់សម្តេចធិបតី ហ៊ុន ម៉ាណែត ដោយភក្តីភាព និងឥតងាករេ, ៣. ប្តេជ្ញាចិត្តរួមគ្នា ដើម្បីទប់ស្កាត់ និងប្រឆាំងដាច់ខាតនូវរាល់សកម្មភាពទាំងឡាយណា ដែលបង្កភាពវឹកវរដល់សង្គម ពិសេសឧបាយកលបដិវត្តពណ៌គ្រប់រូបភាព ចលនាផ្ការីក ចលនាយុវជនជេនស៊ី (Gen Z) និងក្រុមឧទ្ទាមនៅក្រៅប្រទេស។ល។ ដែលប៉ុនប៉ងផ្តួលរំលំ រាជរដ្ឋាភិបាលផ្ទុយពីគោលការណ៍លទ្ធិប្រជាធិបតេយ្យ និង៤. ប្តេជ្ញាចិត្តរួមគ្នា និងសូមប្រកាសគាំទ្រយ៉ាងពេញទំហឹង ចំពោះបេក្ខភាព សម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា សម្រាប់គ្រប់នីតិកាលនៃរដ្ឋសភា ដើម្បីដឹកនាំរាជរដ្ឋាភិបាលជាបន្តទៅទៀត។
នាយឧត្តមសេនីយ៍ ស ថេត ក៏បានណែនាំដល់គណៈគ្រប់គ្រងមជ្ឈមណ្ឌលហ្វឹកហ្វឺន សូមបន្តធ្វើទំនើបកម្មលើកម្មវិធីបណ្តុះបណ្តាល ឱ្យមានលក្ខណៈសមស្រប តាមការវិវត្តរបស់សង្គមជាតិ និងបច្ចេកវិទ្យាឌីជីថល សំដៅលើកកម្ពស់គុណភាព និងសមត្ថភាពវិជ្ជាជីវៈរបស់សិក្ខាកាម ឱ្យកាន់តែល្អប្រសើរ។ ចំពោះសិក្ខាកាមជ័យលាភីទាំងអស់ ត្រូវយកសមត្ថភាព ចំណេះដឹង និងជំនាញវិជ្ជាជីវៈ ដែលទទួលបាន ពីការបណ្តុះបណ្តាលនេះ ទៅបំពេញភារកិច្ចរបស់ខ្លួន ដើម្បីការពារសន្តិសុខ និងសុវត្ថិភាពជូនថ្នាក់ដឹកនាំកំពូលរបស់ជាតិ និងក្រុមគ្រួសារ ឱ្យសម្រេចបានជោគជ័យ នៅគ្រប់កាលៈទេសៈទាំងអស់ ព្រមទាំងចូលរួមចំណែក ក្នុងកិច្ចការងារសង្គមនានា ដើម្បីបម្រើ ប្រជាពលរដ្ឋ និងសង្គមជាតិ ឱ្យបានល្អប្រសើរ។
ក្នុងឱកាសនោះដែរ ឧត្តមសេនីយ៍ឯក ណុប រ័ត្ននិមល មេបញ្ជាការរង នៃបញ្ជាការដ្ឋានអង្គរក្ស មានប្រសាសន៍ថា យើងខ្ញុំទាំងអស់គ្នាជានាយទាហាន នាយទាហានរង និងពលទាហាន ព្រមទាំងសិក្ខាកាម បញ្ចប់វគ្គហ្វឹកហ្វឺនជំនាញអង្គរក្សពិសេស ជំនាន់ទី៣១ និងសិក្ខាកាមវគ្គបន្តជំនាន់ទី៣២ រួមជាមួយវគ្គជំនាញពិសេស ក្នុងមជ្ឈមណ្ឌលហ្វឹកហ្វឺនបញ្ជាការដ្ឋានអង្គរក្សទាំងមូល ប្តេជ្ញាហ៊ាន ប្តូរផ្តាច់ ពលីកម្មគ្រប់បែបយ៉ាង បូជាអាយុជីវិត ដើម្បីការពារ ជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពារ រាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត ប្រកបដោយសុឆន្ទៈរបស់ប្រជាពលរដ្ឋ និងការពារឱ្យ ខាងតែបាននូវសន្តិភាព បូរណភាពទឹកដីនៃកម្ពុជា ទោះក្នុងតម្លៃណាក៏ដោយ៕
