គណបក្សជំទាស់របស់ថៃ រិះគន់នាយករដ្ឋមន្ត្រីថាមិនមានលក្ខណៈសម្បត្តិគ្រប់គ្រាន់ក្នុងការកាន់តំណែងនេះទេ

ថៃ៖ គណបក្សជំទាស់របស់ប្រទេសថៃ កាលពីដើមសប្ដាហ៍នេះ បានរិះគន់នាយករដ្ឋមន្ត្រីថៃ លោកស្រី ផែថុងថាន ស៊ីណាវ៉ាត់ (Paetongtarn Shinawatra) ក្នុងអំឡុងថ្ងៃដំបូងនៃការជជែកដេញដោលរបស់សភា លើញ្ញត្តិសម្តែងការមិនទុកចិត្ត ដោយបក្សជំទាស់ បានចោទប្រកាន់លោកស្រី ថាមិនមានលក្ខណៈសម្បត្តិគ្រប់គ្រាន់ដើម្បីកាន់តំណែងនេះ ហើយលោកស្រីព្រមទាំងអនុញ្ញាតឱ្យលោក ថាក់ស៊ីន ស៊ីណាវ៉ាត់ (Thaksin Shinawatra) ដែលត្រូវជាឪពុក មានឥទ្ធិពលហួសហេតុលើការគ្រប់គ្រងរបស់ខ្លួនថែមទៀតផង ។

លោកថាក់ស៊ីន (Thaksin) ដែលជាអតីតនាយករដ្ឋមន្ត្រី និងជាឥស្សរជននយោបាយដ៏មានឥទ្ធិពលមួយរូប ត្រូវបានហាមឃាត់មិនឱ្យកាន់តំណែង ដោយសារតែលោករងនូវការផ្តន្ទាទោសពាក់ព័ន្ធនឹងជម្លោះផលប្រយោជន៍ និងការរំលោភបំពានអំណាច ដែលនាំឱ្យលោកបង្ខំរស់នៅដោយនិរទេសខ្លួនឯង នៅក្រៅប្រទេសអស់រយៈពេល ១៥ឆ្នាំ ។

ទោះបីជាការស្ទង់មតិពាក់ព័ន្ធនឹងការគាំទ្រលោកស្រី ផែថុងថាន (Paetongtarn) ហាក់ធ្លាក់ចុះក៏ដោយ ក៏លោកស្រី នៅតែចូលរួមនៅក្នុងការជជែកដេញដោលរយៈពេល ២ថ្ងៃ នៅក្នុងជំហរដ៏រឹងមាំមួយ ខណៈក្រុមចម្រុះដែលកំពុងកាន់អំណាចរបស់លោកស្រី នៅតែកាន់កាប់សំឡេងភាគច្រើនក្នុងសភា។ ការណ៍នេះ ទំនងធ្វើឱ្យញ្ញត្តិសម្តែងការមិនទុកចិត្ត នឹងមិនទទួលបានជោគជ័យនោះទេសម្រាប់ការបោះឆ្នោតនៅថ្ងៃពុធ ។

លោកថាក់ស៊ីន ដែលជាអ្នកនយោបាយដ៏មានឥទ្ធិពល និងលេចធ្លោបំផុតនៅក្នុងប្រទេសថៃ បានប្រឈមនូវភាពចម្រូងចម្រាសផ្នែកនយោបាយថៃ ក្នុងរយៈពេល ២៤ ឆ្នាំកន្លងមកហើយ។ លោកបានវិលត្រលប់ទៅកាន់ប្រទេសថៃវិញ នៅឆ្នាំ ២០២៣ ហើយលោកបានចំណាយពេល ៦ ខែនៅក្នុងមណ្ឌលឃុំឃាំងនៅឯមន្ទីរពេទ្យយោធា ក្រោមការដឹកនាំដោយរដ្ឋាភិបាលរបស់គណបក្សភឿថៃដែលលោកជាស្ថាបនិក មុនពេលទទួលបានការដោះលែងឱ្យនៅក្រៅឃុំ ៕