កម្ពស់ទឹកទន្លេមេគង្គនៅខេត្តក្រចេះ គិតត្រឹមព្រឹកថ្ងៃទី០៩ ខែកញ្ញា ឆ្នាំ២០២៥នេះ បានហក់ឡើងដល់កម្រិត ២០.៧៥ម៉ែត្រ ខណៈដែលកម្ពស់ទឹកប្រកាសឲ្យមានការប្រុងប្រយ័ត្ន កម្ពស់ ២២.០០ម៉ែត្រ។
បើយោងតាមរបាយការណ៍របស់រដ្ឋបាលខេត្តក្រចេះ បានឱ្យដឹងថា ចំពោះស្ថានភាពជំនន់ទឹកភ្លៀង និងទឹកជំនន់ទន្លេមេគង្គនៅខេត្តក្រចេះដែលបានហក់ឡើងជាលើកទី២ ក្នុងរយៈពេលជាងមួយសប្តាហ៍ដោយគិតចាប់ពីថ្ងៃទី៣១ ខែសីហា ដល់ថ្ងៃទី០៨ ខែកញ្ញា ឆ្នាំ២០២៥ គឺបានធ្វើឱ្យលិចលង់លំនៅឋានរបស់ប្រជាពលរដ្ឋ ផ្លូវលំ សាលារៀន មន្ទីរពេទ្យ ទីវត្តអារាម មួយចំនួន នៅក្នុងមូលដ្ឋានក្រុង ស្រុក ចំនួន៤ នៃខេត្តក្រចេះ និងមានប្រជាពលរដ្ឋរងផលប៉ះពាល់ ២០៧៤គ្រួសារ និងបានជម្លៀសទៅកាន់ទួលសុវត្ថិភាព ចំនួន២៨គ្រួសារ។
ក្នុងរបាយការណ៍ ក៏បានបញ្ជាក់ដែរថា ស្ថានភាពជំនន់ទឹកភ្លៀងនិងទឹកជំនន់ទន្លេមេគង្គក៏បានបង្កផលប៉ះពាល់ក្រុងស្រុកចំនួន ៤ រួមមាន ស្រុកឆ្លូង ស្រុកព្រែកប្រសព្វ ស្រុកចិត្របុរី និងស្រុកស្នូល។ បានប៉ះពាល់ផ្ទះសម្បែង ៣៣៩ខ្នង, សាលារៀន ០៣កន្លែង, មណ្ឌលសុខភាព ២២កន្លែង, វិហារសាសនា ០៣កន្លែង
ប៉ះពាល់អណ្តូងស្នប់ ០៣កន្លែង, អណ្តូងជីក ០២កន្លែង, បង្គន់អនាម័យ ៣៨បង្គន់ ប៉ះពាល់ស្រូវសន្ទូង និងពង្រោះ សរុប ៧៧៦ហិចតា ខូចខាត ៦០០ហិចតា ប៉ះពាល់ដំណាំរួមផ្សំសរុប ១៦៧ហិចតា និងលិចផ្លូវលំប្រវែង ១៧.៩០៥ ម៉ែត្រ ។
អាជ្ញាធរនៅតាមមូលដ្ឋាន កំពុងយកចិត្តទុកដាក់ ចុះពិនិត្យស្ថានភាពជួយអន្តរាគមន៍ ដើម្បីជម្លៀសប្រជាពលរដ្ឋ និងសត្វពាហនៈ មួយចំនួន ទៅកាន់មន្ទីរទួលសុវត្ថិភាពនៅក្បែរនោះ និងបានត្រៀមកម្លាំង សម្ភារ និងមធ្យោបាយចុះអន្តរាគមន៍ជួយដល់ប្រជាពលរដ្ឋក្នុងករណីទឹកនៅបន្តកើនឡើង៕
