សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កម្ពុជា ត្រៀមខ្លួនធ្វើជាដៃគូទុកចិត្ត ក្នុងការចូលរួមចំណែក ដល់សន្តិសុខស្បៀងរបស់ហ្វីលីពីន ។
ក្នុងឱកាសអញ្ជើញចូលរួម ធ្វើសន្និសីទសារព័ត៌មានរួមគ្នា កម្ពុជា-ហ្វីលីពីន នាថ្ងៃទី៨ ខែកញ្ញា ឆ្នាំ២០២៥ នៅវិមានសន្តិភាព សម្តេចធិបតី ហ៊ុន ម៉ាណែត បានគូសបញ្ជាក់ថា កម្ពុជា ផ្តល់សារៈសំខាន់ ចំពោះទំនាក់ទំនងយូរអង្វែង ជាមួយហ្វីលីពីន ដោយឈរលើមូលដ្ឋាន នៃការគោរពគ្នាទៅវិញទៅមក និងផលប្រយោជន៍រួម ។ រយៈពេលជាច្រើនឆ្នាំកន្លងមក ភាពជាដៃគូនៃទំនាក់ទំនងកម្ពុជា-ហ្វីលីពីន រីកចម្រើនលើគ្រប់វិស័យ រួមមានវិស័យការពារជាតិ សន្តិសុខ ពាណិជ្ជកម្ម និងវិនិយោគ កិច្ចសហប្រតិបត្តិការសេដ្ឋកិច្ច និងការតភ្ជាប់រវាងប្រជាជននិងប្រជាជន ។
សម្តេចធិបតី ហ៊ុន ម៉ាណែត មានប្រសាសន៍ថា ចំពោះពាណិជ្ជកម្មវិនិយោគ និងកិច្ចសហប្រត្តិបត្តិការសេដ្ឋកិច្ច យើងបានពិភាក្សាអំពីគំនិតផ្តួចផ្តើម យន្តការជាក់ស្តែង ទាំងក្នុងក្របខណ្ឌរដ្ឋាភិបាល និងឯកជន ។ កម្ពុជា ត្រៀមខ្លួនធ្វើជាដៃគូទុកចិត្ត ក្នុងការចូលរួមចំណែក ដល់សន្តិសុខស្បៀងរបស់ហ្វីលីពីន ។
ជាមួយគ្នានេះ សម្តេចធិបតី ហ៊ុន ម៉ាណែត ក៏បានថ្លែងអំណរគុណដល់ ឯកឧត្តម ហ្វីឌីណាន់ រ៉ូម៉ូលដេស ម៉ាកូស ជូញៀ ប្រធានាធិបតីនៃសាធារណរដ្ឋហ្វីលីពីន ដែលបានដឹកនាំគណៈប្រតិភូធុរកិច្ច ធុរជនហ្វីលីពីន ចូលរួមនៅឱកាសនេះ ដែលអនុញ្ញាតឱ្យវិស័យឯកជន នៃប្រទេសទាំងពីរ តភ្ជាប់គ្នា និងកសាងភាពជាដៃគូ សម្រាប់កំណើន និងនរវានុវត្តន៍ ។
បន្ថែមលើនេះ សម្តេចធិបតី នាយករដ្ឋមន្ត្រី ក៏បានគូសបញ្ជាក់ថា កម្ពុជា រីករាយនៃកំណើននៃទំនាក់ទំនងរវាងប្រជាជននិងប្រជាជន ហើយស្វាគមន៍ប្រជាជនហ្វីលីពីននៅកម្ពុជា ដែលបានចូលរួមចំណែកការអភិវឌ្ឍសង្គមសេដ្ឋកិច្ច នៃប្រទេសទាំងពីរ ព្រមទាំងស្វាគមន៍ប្រជាជនហ្វីលីពីន កាន់តែច្រើនអញ្ជើញមកកម្ពុជា ក្នុងនាមជាភ្ញៀវទេសចរ វិនិយោគិន និងដៃគូពាណិជ្ជកម្មផងដែរ៕
