ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលបានលើកឡើងថា នាពេលថ្មីៗនេះនៅលើបណ្តាញសង្គមមានការក្លែងបន្លំគណនីជាច្រើនដោយប្រើប្រាស់ឈ្មោះខ្មែរ សរសេរអក្សរខ្មែរ ប៉ុន្តែម្ចាស់គណនីទាំងនោះមិនមែនជាខ្មែរនោះទេ ។
អ្នកយកព័ត៌មានយើងធ្វើសេចក្តីរាយការណ៍
ក្នុងសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅថ្ងៃទី២ ខែសីហា ឆ្នាំ២០២៥ ឯកឧត្តម ប៉ែន បូណា ថ្លែងថា ការក្លែងបន្លំនេះ គឺជាកលល្បិចថ្មីមួយទៀតដែលពួកគេប្រើប្រាស់ដើម្បីក្លែងបន្លំធ្វើជាជនជាតិខ្មែរ ក្នុងគោលបំណងបំបែកបំបាក់ស្មារតីសាមគ្គីភាពរបស់ខ្មែរ ។ ដូច្នេះពលរដ្ឋខ្មែរត្រូវប្រុងប្រយ័ត្នទាំងអស់គ្នា កុំចាញ់ល្បិចកលទាំងនេះឲ្យសោះ។
រដ្ឋមន្ត្រីប្រតិភូអមនាយករដ្ឋមន្ត្រីបានគូសបញ្ជាក់ថា “ឥឡូវនេះ មានការក្លែងបន្លំគណនេយ្យហ្វេសប៊ុកជាច្រើន ដោយគេបានប្រើប្រាស់ឈ្មោះខ្មែរ ប៉ុន្តែអ្នកដែលបង្កើត និងអ្នកប្រើប្រាស់គណនេយ្យទាំងនោះមិនមែនជាខ្មែរទេ ។ នេះគឺ ជាកលល្បិចថ្មីមួយទៀត” ។
ឯកឧត្តម ប៉ែន បូណាក៏បានផ្តាំទៅប្រជាពលរដ្ឋខ្មែរទាំងក្នុងនិងក្រៅប្រទេសត្រូវរួម គ្នាជាធ្លុងមួយបង្កើតជាខឿនការពារបូរណភាព ទឹកដី និងការពារសេចក្តីថ្លៃថ្នូររបស់ជាតិខ្មែរទាំងមូល ។
សូមបញ្ជាក់ថា ក្រោយកងទ័ពកម្ពុជា-ថៃបានផ្ទុះអាវុធដាក់គ្នាកាលពីថ្ងៃទី២៤ ខែកក្កដា ហើយរហូតមានកិច្ចព្រមព្រៀងបទឈប់បាញ់ចូលជាធរមាននារាត្រីថ្ងៃទី២៨ ខែកក្កដាមក ឃើញមានការបង្កើតអាខោនហ្វេសប៊ុកក្លែងក្លាយជាច្រើន ដោយប្រើពាក្យសម្តីមិនសមរម្យលើបូរណភាពទឹកដីខ្មែរពីសំណាក់ភាគីថៃ ៕
