កែប៖ រដ្ឋបាលខេត្តកែប បានប្រារព្ធពិធីអបអរសាទរខួបអនុសាវរីយ៍លើកទី ១១៤ នៃទិវាអន្តរជាតិនារី ៨មីនា ក្រោមប្រធានបទ សិទ្ធិ សមភាព និងភាពអង់អាច ចំពោះស្ត្រី និងក្មងស្រីគ្រប់រូប ក្រោមអធិបតីភាព ឯកឧត្តម អ៊ុក ថា ប្រធានក្រុមប្រឹក្សាខេត្ត និងឯកឧត្ដមបណ្ឌិត សោម ពិសិដ្ឋ អភិបាលនៃគណៈអភិបាលខេត្ត និងលោកជំទាវ ស ម៉ាលីដា ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ សាខាខេត្តកែប។ ក្នុងឱកាសដ៏ថ្លៃថ្លានេះ អភិបាលខេត្តកែប ឯកឧត្តមបណ្ឌិត សោម ពិសិដ្ឋ បានសម្តែងនូវការអរគុណនូវការរៀបចំ និងគាំទ្រយ៉ាងពេញទំហឹងនូវប្រធានបទ “ សិទ្ធិ សមាសភាព និងភាពអង់អាចចំពោះស្រ្តី និងក្មេងស្រីគ្រប់រូប” ដែលស្របទៅនឹងស្ថានភាពនាពេលបច្ចុប្បន្ន នៅព្រឹកថ្ងៃចន្ទ ទី១៧ ខែមីនា ឆ្នាំ២០២៥។
ឯកឧត្តមបានមានប្រសាសន៍បន្ថែមទៀតថា សន្តិភាព និងការអភិវឌ្ឍរហូតមកដល់ថ្ងៃនេះគឺជាកេរ្តិ៍មរតកមិនអាចកាត់ថ្លៃបានរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្រ្តីនៃព្រះរាជាណាចក្រកម្ពុជា ដែលយេីងទាំងអស់គ្នាមានឱកាសជួបជុំគ្នាប្រារព្ធទិវាអន្តរជាតិនារី ៨មីនា ខួបលេីកទី១១៤ ឆ្នាំ២០២៥នេះ និងត្រូវបានបន្តថែរក្សាដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ទន្ទឹមនេះ ឯកឧត្តមក៏សូមឱ្យមានការលេីកកម្ពស់សមភាពយេនឌ័រនៅគ្រប់ស្ថាប័ន អង្គភាពប្រកបដោយបរិយាបន្ន ដោយផ្តល់ឱកាសអោយស្រ្តីកាន់មុខតំណែង តួនាទីស្របតាមសមត្ថភាព ជាមួយនេះស្រ្តីគ្រប់រូបក៏ត្រូវពង្រឹងសមត្ថភាពខ្លួនជាប្រចាំផងដែរ។ ស្របជាមួយគ្នានេះ ឯកឧត្តមបណ្ឌិតអភិបាលខេត្ត ក៏បានអំពាវនាវដល់ស្រ្តីគ្រប់រូបចូលរួមថែរក្សាសន្តិភាពដេីម្បីកូនចៅជំនាន់ក្រោយ ដោយកុំជឿ និងចាញ់បោកឧបាយកលអ្នកនយោបាយបោកប្រាស់អគតិមួយក្តាប់តូច។
សម្រាប់ទិវាអន្តរជាតិនារី ៨មីនា នៅប្រទេសកម្ពុជា ត្រូវបានរៀបចំឡើងក្រោមប្រធានបទស្ដីពី សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប សម្រាប់ជាគោលគំនិតក្នុងការពិភាក្សា និងជួយពង្រឹង ការអប់រំចំពោះយុវវ័យនៅក្នុងសង្គម ក៏ដូចជាដើម្បីដាស់តឿន និងកែលម្អឥរិយាបថរបស់យុវវ័យ នៅខេត្តកែប នាឱកាសនេះត្រូវបានអញ្ជេីញចូលរួមដោយឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត អភិបាលរងខេត្ត ឯកឧត្តមប្រធានសាលាដំបូងខេត្ត ឯកឧត្តមព្រះរាជអជ្ញានៃអយ្យការអមសាលាដំបូងខេត្ត លោកឧត្តមសេនីយ៍ ឧត្តមអគ្គានុរក្ស វរសេនីយ៍ ស្នងការ មេបញ្ជាការ លោក លោកស្រី ប្រធានមន្ទីរ អង្គភាព ទីចាត់ការ អភិបាលក្រុង ស្រុក ជាច្រេីនកុះករ៕
