ភ្នំពេញ៖ លោកកើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ រួមជាមួយ លោកបណ្ឌិត ជីវ កេង ប្រធានតុលាការកំពូល និងលោកស្រី ជា លាង អគ្គព្រះរាជអាជ្ញានៃមហាអយ្យការអមតុលាការកំពូល បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៤ និងកំណត់ទិសដៅការងារជាអាទិភាពឆ្នាំ២០២៥។ សន្និបាតនេះ បានបញ្ចប់ បន្ទាប់ពីបានប្រព្រឹត្តទៅអស់រយៈពេល ២ថ្ងៃកន្លះ ប្រកបដោយបរិយាកាសស្និទ្ធស្នាល សាមគ្គីភាព និងស្មារតីទទួលខុសត្រូវខ្ពស់។
បន្ទាប់ពីឆ្លងកាត់កិច្ចពិភាក្សាដេញដោលយ៉ាងសកម្ម និងផុលផុសអស់រយៈពេលជិត ៣ថ្ងៃ លើបទបង្ហាញចំនួន ៤ និងប្រធានបទពិភាក្សាដ៏មានសារៈសំខាន់ចំនួន ២, អង្គសន្និបាតបានសម្រេចរួមគ្នាក្នុងការដាក់ចេញនូវដំណោះស្រាយចំពោះបញ្ហាប្រឈមពាក់ព័ន្ធនានា ដែលដំណោះស្រាយរួមនេះ នឹងត្រូវបានរៀបចំចេញជាសេចក្តីសម្រេចចិត្តរបស់អង្គសន្និបាត។
យោងតាមសេចក្តីប្រកាសព័ត៌មាន បានឱ្យដឹងថា អង្គសន្និបាតវិស័យយុត្តិធម៌ បានជំរុញឱ្យចៅក្រម ព្រះរាជអាជ្ញា ព្រះរាជអាជ្ញារង ក្រឡាបញ្ជី អាជ្ញាសាលា និងមន្ត្រីរាជការគ្រប់រូប ត្រូវបន្តប្រកាន់ខ្ជាប់នូវក្រមសីលធម៌ក្នុងការអនុវត្តការងាររបស់ខ្លួន និងត្រូវយកចិត្តទុកដាក់ខ្ពស់ក្នុងការចាត់ការសំណុំរឿងឱ្យបានម៉ឺងម៉ាត់ ត្រឹមត្រូវ និងយុត្តិធម៌ ស្របតាមច្បាប់ និងនីតិវិធីជាធរមាន។
អង្គសន្និបាត បានគាំទ្របន្តលើកកម្ពស់ការអនុវត្តនូវគោលការណ៍ “គុណាធិបតេយ្យ” ក្នុងវិស័យយុត្តិធម៌ ព្រមទាំងយកចិត្តទុកដាក់ខ្ពស់ក្នុងការផ្តល់ការលើកទឹកចិត្តនានាដល់មន្ត្រីរាជការ និងមន្ត្រីតុលាការទាំងអស់ ដែលបានខិតខំប្រឹងប្រែងអនុវត្តតួនាទី និងភារកិច្ចរបស់ខ្លួន ប្រកបដោយភាពជាម្ចាស់, ការទទួលខុសត្រូវខ្ពស់ និងមានសាមគ្គីភាពផ្ទៃក្នុង ជាពិសេស បានកសាងស្នាដៃធំៗបម្រើឱ្យវិស័យយុត្តិធម៌ និងសង្គមជាតិ។
ជាមួយគ្នានេះ អង្គសន្និបាត បានកត់សម្គាល់អំពីការពង្រឹងវិន័យការងារ និងក្រមសីលធម៌វិជ្ជាជីវៈរបស់ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា និងមន្ត្រីរាជការទាំងអស់នៅក្នុងវិស័យយុត្តិធម៌ ដែលនៅតែជាការងារ អាទិភាព ត្រូវបន្តរឹតបន្តឹងឱ្យបានម៉ឺងម៉ាត់ និងដោយគ្មានការយោគយល់ចំពោះអ្នកល្មើសវិន័យឡើយ។
សូមគូសបញ្ជាក់ផងដែរថា សេចក្ដីសម្រេចចិត្តរបស់សន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៤ និងកំណត់ទិសដៅការងារជាអាទិភាពឆ្នាំ២០២៥ នឹងក្លាយជាគោលការណ៍រួម និងស្មារតីរួមបន្ថែមទៀត សម្រាប់ជាគតិច្បាប់ដែលត្រូវអនុវត្តដោយសាលាជម្រះក្ដី និងអង្គការអយ្យការអមសាលាជម្រះក្ដីគ្រប់ជាន់ថ្នាក់នៅទូទាំងព្រះរាជាណាចក្រកម្ពុជា សំដៅធានាឱ្យបាននូវសង្គតិភាព ឯកភាព និងប្រសិទ្ធភាពនៃការអនុវត្តច្បាប់ ក្នុងការផ្តល់យុត្តិធម៌ឱ្យបានត្រឹមត្រូវ និងប្រកបដោយទំនុកចិត្តជូនប្រជាពលរដ្ឋ៕
