ព្រៃស ៖ ព្រឹកថ្ងៃអង្គារ ទី១៣ ខែឧសភា ឆ្នាំ២០២៥ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតីក្នុងពិធីបិទ និងបើកវគ្គបណ្ដុះបណ្ដាលក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់ជនជាប់ឃុំ នៅមណ្ឌលអប់រំកែប្រែទី១ ទី២ និងពន្ធនាគាររាជធានីភ្នំពេញដោយសហការរៀបចំដោយវិទ្យាស្ថានជាតិសហគ្រិនភាព និងនវានុវត្តន៍(NIEI) នៃក្រសួងការងារបណ្តុះបណ្តាលវិជ្ជាជីវៈ និងមុខរបរ ដោយមានការអញ្ជើញចូលរួមពី ឯកឧត្តម អគ្គនាយករង ប្រធាននាយកដ្ឋាន តំណាងវិទ្យាស្ថាន (NIEI) នៃក្រសួងការងារបណ្តុះបណ្តាលវិជ្ជាជីវៈ និងមុខរបរ តំណាងអង្គការសម្ព័ន្ធមេត្រីភាពពន្ធនាគារ(PFC) តំណាងអង្គការ(CRS) ប្រធានមណ្ឌលអប់រំកែប្រែ ប្រធានពន្ធនាគារ និងមន្រ្តីជំនាញពាក់ព័ន្ធ។
ឆ្លៀតនៅក្នុងឱកាសនោះ ឯកឧត្តម អគ្គនាយក បានធ្វើការសំណេះសំណាលជាមួយជនជាប់ឃុំដែលបានបញ្ចប់វគ្គបណ្តុះបណ្តាលទាំងអស់ត្រូវបន្តធ្វើការយកចិត្តទុកដាក់ ស្តាប់នូវការបង្ហាត់បង្ហាញរបស់គ្រូបង្គោល និងបន្តខិតខំអភិវឌ្ឍន៍នូវចំណេះជំនាញវិជ្ជាជីវៈដែលខ្លួនបានរៀនសូត្រ ហើយយកទៅប្រកបរបរចិញ្ចឹមជីវិតក្រោយពេលធ្វើសមាហរណកម្មចូលទៅក្នុងសហគមន៍វិញ។ ឯកឧត្តម អគ្គនាយក ក៏បានប្រគល់លិខិតថ្លែងអំណរគុណជូន វិទ្យាស្ថាន គ្រូបង្គោល និងចែកវិញ្ញាបនបត្របញ្ចប់ការសិក្សាដល់ជនជាប់ឃុំ និងបានផ្តាំផ្ញើ
នូវមតិសំខាន់មួយចំនួន រួមមាន៖
– សូមប្រធាននាយកដ្ឋានជំនាញ និងប្រធានមណ្ឌលអប់រំកែប្រែ និងពន្ធនាគារ ត្រូវបន្តយកចិត្តទុកដាក់ពង្រឹងការងារដឹកនាំ និងបន្តពង្រឹងកិច្ចសហការល្អ ជាមួយស្ថាប័ន អង្គភាពពាក់ព័ន្ធ និអង្គការដៃគូនានា ស្នើសុំកិច្ចគាំទ្របន្ថែមនូវកម្មវិធីបណ្តុះបណ្តាលវិជ្ជាជីវៈ ដល់ទណ្ឌិត ទាំងកម្មវិធីដែលមានស្រាប់ និងកម្មវិធីថ្មីៗបន្ថែមទៀត។
– បន្តពង្រឹងក្រុមគ្រូបង្គោលនៅតាមនាយកដ្ឋានជំនាញ និងនៅតាមអង្គភាពពន្ធនាគារ សិក្សាពិសោធន៍ ពិនិត្យរៀបចំជ្រើសរើសកម្មវិធីបណ្តុះបណ្តាលជំនាញឱ្យបានសមស្របតាមតម្រូវការនឹងបរិបទទីផ្សារការងារបច្ចុប្បន្ន។
– ត្រូវបំផុសឱ្យជនជាប់ឃុំ ស្ម័គ្រចិត្តចូលរួម ខិតខំយកចិត្តទុកដាក់រៀនសូត្រ និងជំរុញលើកទឹកចិត្តឱ្យបន្តសិក្សាឱ្យបានចប់វគ្គ។
– ចំពោះជនជាប់ឃុំដែលបានបញ្ចប់ការសិក្សានៅវគ្គជំនាញទាំងអស់នេះ ត្រូវពង្រឹងបន្ថែមនូវសមត្ថភាពដែលខ្លួនបានរៀនសូត្រ ហើយយកទៅអភិវឌ្ឍន៍បន្ថែមទៀត ដើម្បីជាគុណប្រយោជន៍នៅពេលដែលត្រលប់ចូលទៅក្នុងសហគមន៍វិញដើម្បីយកទៅប្រកបមុខរបរសម្រាប់អាជីពផ្ទាល់ខ្លួននាពេលអនាគត៕
