ភ្នំពេញ ៖ ប្រទេសឡាវដែលមានប្រព័ន្ធផ្លូវដែកតភ្ជាប់ពីទីក្រុងវៀងចន្ទ ទៅកាន់ទីក្រុងគុនមីង ខេត្តយូណាន ប្រទេសចិន បានអនុញ្ញាតឱ្យកម្ពុជាប្រើប្រាស់ប្រព័ន្ធផ្លូវដែក និងរថភ្លើងល្បឿនលឿនដឹកផលិផលស្វាយទៅកាន់ប្រទេសចិន ឬប្រទេសទី៣ ដើម្បីបើកទីផ្សារថ្មី សម្រាប់ផលិតផលកសិកម្មរបស់កម្ពុជា ។
នេះបើយោងតាមសេចក្តីប្រកាសព័ត៌មានស្ដីពីលទ្ធផលនៃដំណើរទស្សនកិច្ចផ្លូវការរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខប្រមាញ់និងនេសាទ នៅសាធារណរដ្ឋប្រជាធិបតេយ្យប្រជាមានិតឡាវចាប់ពីថ្ងៃទី៣០ ខែមេសា ដល់ថ្ងៃទី៣ ខែឧសភា ឆ្នាំ២០២៥ ។
ក្រៅពីការអនុញ្ញាតឱ្យប្រើប្រាស់ប្រព័ន្ធផ្លូវដែក និងរថភ្លើងល្បឿនលឿននេះ ភាគីទាំងពីរ ក៏បានឯកភាពជំរុញកិច្ចសហប្រតិបត្តិការលើការងារអាទិភាពមានដូចជា កិច្ចសហប្រតិបត្តិការលើធាតុចូលកសិកម្ម ជាពិសេស ធាតុផ្សំនៃជីកសិកម្ម ដោយផ្តោតសំខាន់ លើជីប៉ូតាស (potash-based fertilizer), ការបន្តពង្រឹងកិច្ចសហប្រតិបត្តិការផ្សេងៗទៀត លើឆាកអន្តរជាតិ ក្នុងវិស័យកសិកម្ម ដើម្បីផលប្រយោជន៍រួម នៃប្រទេសទាំងពីរផងដែរ។
ដំណើរទស្សនកិច្ចនេះ មានគោលបំណងពង្រឹងកិច្ចសហប្រតិបត្តិការលើ វិស័យកសិកម្មរវាងប្រទេសទាំងពីរ និងពិនិត្យលទ្ធភាពតភ្ជាប់ការផ្គត់ផ្គង់ធាតុចូលសម្រាប់ផលិតកម្មជីកសិកម្មពីឡាវមកកម្ពុជា ។ ក្នុងកិច្ចប្រជុំទ្វេភាគីរវាងក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា និងក្រសួងកសិកម្ម និងរុក្ខាកម្មនៃសាធារណរដ្ឋប្រជាធិបតេយ្យ ប្រជាមានិតឡាវ ឯកឧត្តមរដ្ឋមន្ត្រីទាំងពីរបានពិនិត្យពិភាក្សាលើកិច្ចសហប្រតិបត្តិការក្រោមក្របខ័ណ្ឌនៃ
អនុស្សរណៈនៃការយោគយល់គ្នា (MOU) ដែលភាគីទាំងពីរបានឯកភាពគ្នា និងចុះហត្ថលេខាកាលពីថ្ងៃទី៤ ខែធ្នូ ឆ្នាំ២០២៤ កន្លងទៅ។
ជាលទ្ធផលនៃកិច្ចប្រជុំភាគីទាំងពីរបានឯកភាពគ្នាជំរុញកិច្ចសហប្រតិបត្តិការ លើការងារអាទិភាពចំនួន៣សំខាន់ៗដូចខាងក្រោម៖
១-កិច្ចសហប្រតិបត្តិការលើធាតុចូលកសិកម្ម ជាពិសេសធាតុផ្សំនៃជីកសិកម្ម ដោយផ្តោតសំខាន់លើជីប៉ូតាស (potash-based fertilizer) ។
២-ការជំរុញកសិពាណិជ្ជកម្មរវាងប្រទេសទាំងពីរ ដោយផ្តោតលើការនាំចេញផលិតផលស្វាយទៅ ប្រទេសចិន ឬប្រទេសទី៣ តាមរយៈការប្រើប្រាស់ប្រព័ន្ធផ្លូវដែក និងរថភ្លើងល្បឿនលឿនឆ្លងកាត់ ប្រទេសឡាវ ដើម្បីបើកទីផ្សារថ្មីសម្រាប់ផលិតផលកសិកម្មរបស់កម្ពុជា ។
៣-ការបន្តពង្រឹងកិច្ចសហប្រតិបត្តិការផ្សេងៗទៀត លើឆាកអន្តរជាតិក្នុងវិស័យកសិកម្ម ដើម្បីផលប្រយោជន៍រួមនៃប្រទេសទាំងពីរ ។
សូមជម្រាបពាក់ព័ន្ធនឹងផ្លូវដែកនេះ ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ក្នុងសន្និសិទសារព័ត៌មានមួយ ស្ដីអំពីលទ្ធផលនៃដំណើរទស្សនកិច្ចរបស់លោកប្រធានាធិបតីចិន ស៊ី ជីនពីង ក្នុងប្រទេសកម្ពុជា កាលពីពាក់កណ្ដាលខែមេសា ក៏បានបង្ហើបឱ្យដឹងផងដែរថា ភាគីនៃប្រទេសទាំងពីរកម្ពុជា-ចិនបាននិងកំពុងពិភាក្សាគ្នាលើលទ្ធភាពតភ្ជាប់ផ្លូវដែកពីកម្ពុជាទៅកាន់ប្រទេសចិន តែមិនទាន់បញ្ជាក់ថា ត្រូវឆ្លងកាត់ប្រទេសវៀតណាម ថៃ ឬឡាវនៅឡើយនោះទេ។
ប្រព័ន្ធផ្លូវដែក គឺការតភ្ជាប់ជាយុទ្ធសាស្ត្រមួយ ក្នុងចំណោមយុទ្ធសាស្ត្រជាច្រើន ក្រោមគោលនយោបាយផ្លូវមួយខ្សែក្រវ៉ាត់មួយ (BRI) ដែលដាក់ចេញដោយលោកប្រធានាធិបតីចិន ស៊ី ជីនពីង ក្នុងជំរុញកិច្ចសហប្រតិបត្តិការ ជាមួយបណ្ដាប្រទេសកំពុងអភិវឌ្ឍន៍ (Global South) ក្នុងនោះរួមមានទាំងកម្ពុជាផងដែរ៕
