ភ្នំពេញ៖ ក្នុងទិសដៅជំរុញទំនាក់ទំនងកម្ពុជា-វៀតណាមឱ្យកាន់តែរីកចម្រើនឥតឈប់ឈរថ្នាក់ដឹកនាំទាំងពីរ កម្ពុជា-វៀតណាម គាំទ្របន្តជំរុញការផ្លាស់ប្តូរទស្សនកិច្ចគ្រប់កម្រិត និងបានឯកភាពលើសំណើរបស់សម្តេចតេជោចំពោះគំនិតផ្តួចផ្តើមយន្តការកិច្ចប្រជុំ៣+៣ ដែលជាកិច្ចប្រជុំកំពូលកម្ពុជា-វៀតណាម-ឡាវ ដោយមានការចូលរួមរបស់ប្រធានគណបក្សទាំងបី ប្រធានសភាទាំង៣ និងនាយករដ្ឋមន្ត្រីទាំង៣។
នេះជាការបញ្ជាក់របស់សេចក្តីប្រកាសព័ត៌មានស្តីពី លទ្ធផលនៃដំណើរទស្សនកិច្ចរបស់សម្តេចតេជោ ហ៊ុន សែន ក្នុងឱកាសចូលរួមខួបអនុស្សាវរីយ៍លើកទី៥០ នៃទិវារំដោះភាគខាងត្បូង និងបង្រួបបង្រួមជាតិវៀតណាម នៅទីក្រុងហូជីមិញ សាធារណរដ្ឋសង្គមនិយមវៀតណាម ដែលបានប្រព្រឹត្តទៅពីថ្ងៃទី២៩ ដល់ថ្ងៃទី៣០ ខែមេសា ឆ្នាំ២០២៥។
សេចក្ដីប្រកាសព័ត៌មានបានឱ្យដឹងទៀតថា នៅក្នុងឱកាសទស្សនកិច្ចសម្ដេចតេជោបានជួបពិភាក្សាការងារទ្វេភាគីជាមួយលោក តូ ឡឹម អគ្គលេខាធិការបក្សកុម្មុយនីស្តវៀតណាម លោក ជិន ថាញ់មិន ប្រធានរដ្ឋសភាវៀតណាម និងលោក ផាម មិញជិញ នាយករដ្ឋមន្ត្រីវៀតណាម។
នៅក្នុងជំនួបខាងលើ សម្តេចតេជោបានសម្តែងនូវអំណរសាទរយ៉ាងកក់ក្ដៅបំផុតចំពោះការប្រារព្ធទិវាជាប្រវត្តិសាស្ត្ររបស់វៀតណាម។ ហើយក្នុងគ្រានោះដែរ ថ្នាក់ដឹកនាំវៀតណាមក៏បានរម្លឹកអំពីការរួមចំណែកដ៏ថ្លៃថ្លាមិនអាចកាត់ថ្លៃបានរបស់កម្ពុជា ក្នុងការជួយឧបត្ថម្ភគាំទ្រ និងជ្រោមជ្រែងដល់កងទ័ព និងប្រជាជនវៀតណាមក្នុងបុព្វហេតុរំដោះ និងបង្រួបបង្រួមជាតិ ដែលជាមូលដ្ឋានគ្រឹះសម្រាប់វៀតណាមសម្រេចបាននូវសមិទ្ធផលយ៉ាងធំធេងក្នុងការរក្សាសន្តិភាព ការកសាងនិងអភិវឌ្ឍជាតិឱ្យមានការរីកចម្រើនលើគ្រប់វិស័យដូចបច្ចុប្បន្ន។
សេចក្ដីប្រកាសដដែលបានគូសបញ្ជាក់ទៀតថា ភាគីទាំងពីរបានសម្តែងនូវការពេញចិត្តចំពោះការចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីសម្រាប់អនុវត្តឆ្នាំ២០២៥-២០២៦ និងការបង្កើតគណៈកម្មាធិការពាណិជ្ជកម្មចម្រុះ ដើម្បីបង្កើនទំហំពាណិជ្ជកម្មឱ្យដល់គោលដៅ២០ពាន់លានដុល្លារអាម៉េរិកនាពេលប៉ុន្មានឆ្នាំដ៏ខ្លីខាងមុខនេះ។
ក្រៅពីនេះក៏មានកិច្ចសហការលើវិស័យសំខាន់ៗផ្សេងទៀត រួមមាន៖ ការពារជាតិ សន្តិសុខ វិនិយោគ ថាមពល បច្ចេកវិទ្យា សុខាភិបាល អប់រំ ការបណ្តុះបណ្តាលវិជ្ជាជីវៈ ទេសចរណ៍ ការតភ្ជាប់ និងទំនាក់ទំនងរវាងប្រជាជននិងប្រជាជនផងដែរ។
បន្ថែមពីលើនេះ ភាគីទាំងពីរក៏បានផ្លាស់ប្តូរទស្សនៈក្នុងការបន្តជំរុញកិច្ចសហប្រតិបត្តិការក្នុងក្របខ័ណ្ឌពហុភាគីដែលមានដូចជា ការពង្រឹងសមាហរណកម្មអាស៊ានឱ្យកាន់តែជិតស្និទ្ធ និងពេញលេញប្រកបដោយបរិយាបន្ន សុខដុមរមនា ភាពធន់ និងវិបុលភាពយូរអង្វែង។
ទន្ទឹមនឹងការវាយតម្លៃខ្ពស់ចំពោះទំនាក់ទំនងដ៏ពិសេសរវាងកម្ពុជា-វៀតណាម ដែលផ្សារភ្ជាប់ ដោយចំណងមិត្តភាពជាប្រពៃណី សាមគ្គីភាព ការជឿទុកចិត្តគ្នា ការយោគយល់គ្នា និងការជួយឧបត្ថម្ភគាំទ្រគ្នាទៅវិញទៅមកគ្រប់កាលៈទេសៈ ថ្នាក់ដឹកនាំនៃប្រទេសទាំងពីរបានប្ដេជ្ញាបន្តពង្រឹងនិងពង្រីកបន្ថែមទៀតនូវទំនាក់ទំនងដ៏ល្អនេះ ទាំងក្នុងក្របខ័ណ្ឌនីតិប្បញ្ញត្តិ នីតិប្រតិបត្តិ និងក្របខ័ណ្ឌបក្ស ដើម្បីជាមរតកដល់អ្នកជំនាន់ក្រោយក្នុងការបន្តខិតខំពូនជ្រំ និងលើកកម្ពស់កិច្ចសហប្រតិបត្តិការឈ្នះឈ្នះសម្រាប់ការអភិវឌ្ឍ និងវិបុលភាពយូរអង្វែងជូនប្រជាជន និងប្រទេសទាំងពីរ។
សូមជម្រាបថា ទស្សនកិច្ចរបស់សម្តេចតេជោ ហ៊ុន សែន ក្នុងនាមជាប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នៅសាធារណរដ្ឋសង្គមនិយមវៀតណាម ពិតជាបានឆ្លុះបញ្ចាំងពីសាមគ្គីភាពឥតងាករេ និងការយកចិត្តទុកដាក់ខ្ពស់នៃថ្នាក់ដឹកនាំប្រទេសទាំងពីរ សំដៅជំរុញទំនាក់ទំនងកម្ពុជា-វៀតណាមដែលល្អស្រាប់ឱ្យកាន់តែស៊ីជម្រៅ និងឈានដល់កម្រិតថ្មីមួយទៀតស្របតាមស្មារតី “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង” ដែលនឹងរួមចំណែកដល់សន្តិភាព ស្ថិរភាព និងការអភិវឌ្ឍប្រកបដោយចីរភាពក្នុងតំបន់ និងពិភពលោក៕
