កងរាជអាវុធហត្ថខេត្តបន្ទាយមានជ័យ បានបញ្ជូនជនសង្ស័យចំនួន ៩នាក់ ទៅសាលាដំបូងខេត្ត នៅរសៀលថ្ងៃទី០៧ ខែកុម្ភៈ ឆ្នាំ២០២៦ ដើម្បីអនុវត្តតាមនីតិវិធី ចំពោះបទល្មើសលួចស្ថានទម្ងន់ទោស (កាច់សោរកម៉ូតូ) សមគំនិតក្នុងអំពើលួចស្ថានទម្ងន់ទោស ទទួលផលចោរកម្ម និងប្រើប្រាស់សារធាតុញៀនដោយខុសច្បាប់។
ករណីនេះបានកើតឡើង កាលពីវេលាម៉ោង ០៨ និង ៣០នាទី ថ្ងៃទី០២ ខែកុម្ភៈ ឆ្នាំ២០២៦ បន្ទាប់ពីកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ទទួលបានពាក្យបណ្តឹងពីជនរងគ្រោះឈ្មោះ យ៉ាន សុផាន់នី ភេទស្រី អាយុ ២០ឆ្នាំ ស្តីពីការបាត់ម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០២៦ ផ្លាកលេខ បន្ទាយមានជ័យ 1AE-1844 នៅចំណុចមណ្ឌល៦ ភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត។
ក្រោយទទួលបានពាក្យបណ្តឹង កម្លាំងកងរាជអាវុធហត្ថក្រុងប៉ោយប៉ែត ដឹកនាំដោយលោកអនុសេនីយ៍ឯក តិល តៃលីវ មេបញ្ជាការស្តីទី បានធ្វើការស្រាវជ្រាវ និងឃាត់ខ្លួនជនសង្ស័យដំបូងចំនួន ២នាក់ រួមមាន ឈ្មោះ ទុយ ទិត្យ ហៅឡូយ និងឈ្មោះ អ៊ី ថាត់ ហៅវីត ហើយនាំមកសួរនាំតាមនីតិវិធី។
តាមចម្លើយសារភាព កម្លាំងជំនាញបានបន្តសហការជាមួយកងរាជអាវុធហត្ថក្រុងសិរីសោភ័ណ ដឹកនាំដោយលោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស ធ្វើការស្រាវជ្រាវបន្ថែម និងឃាត់ខ្លួនបក្ខពួកជនសង្ស័យជាបន្តបន្ទាប់ នៅក្រុងសិរីសោភ័ណ ស្រុកមង្គលបូរី និងខេត្តប៉ៃលិន រហូតសរុបបានជនសង្ស័យចំនួន ៩នាក់។
វត្ថុតាងដកហូតបានរួមមាន ម៉ូតូម៉ាកហុងដាឌ្រីម ពណ៌ខ្មៅ ផ្លាកលេខ បន្ទាយមានជ័យ 1AE-1844 ចំនួន ១គ្រឿង (បានប្រគល់ជូនជនរងគ្រោះវិញ) ម៉ូតូចំនួន ៤គ្រឿងផ្សេងទៀត និងផ្លាកលេខម៉ូតូ ភ្នំពេញ 1JN-6647 ចំនួន ១សន្លឹក ដែលត្រូវបានរក្សាទុកនៅបញ្ជាការដ្ឋានកងរាជអាវុធហត្ថខេត្ត។
លោកវរសេនីយ៍ទោ ព្រហ្ម ថេង បានឱ្យដឹងថា ប្រតិបត្តិការបង្ក្រាបនេះ បានធ្វើឡើងដោយមានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។
បច្ចុប្បន្ន ជនសង្ស័យទាំង ៩នាក់ ត្រូវបានបញ្ជូនទៅសាលាដំបូងខេត្ត ដើម្បីបន្តអនុវត្តតាមនីតិវិធីច្បាប់៕
