អគ្គស្នងការដ្ឋាននគរបាលជាតិ បានប្រកាសថា នឹងចាប់ផ្តើមរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកឡើងវិញ ចាប់ពីខែកុម្ភៈ ឆ្នាំ២០២៦ តទៅ បន្ទាប់ពីសង្កេតឃើញថា ករណីគ្រោះថ្នាក់ចរាចរណ៍នៅទូទាំងប្រទេសមានការកើនឡើងគួរឱ្យព្រួយបារម្ភ។
យោងតាមសេចក្តីប្រកាសព័ត៌មានរបស់អគ្គស្នងការដ្ឋាននគរបាលជាតិ នៃក្រសួងមហាផ្ទៃ បានឱ្យដឹងថា ក្នុងរយៈពេល ១៦០ ថ្ងៃ គិតចាប់ពីថ្ងៃទី២៥ ខែកក្កដា ដល់ថ្ងៃទី៣១ ខែធ្នូ ឆ្នាំ២០២៥ ការត្រួតពិនិត្យការអនុវត្តច្បាប់ចរាចរណ៍ត្រូវបានបន្ធូរបន្ថយមួយរយៈ ដោយសារស្ថានភាពជម្លោះប្រដាប់អាវុធនៅតំបន់ព្រំដែនកម្ពុជា–ថៃ។
ក្នុងអំឡុងពេលនោះ ករណីគ្រោះថ្នាក់ចរាចរណ៍បានកើនឡើងចំនួន ៣៤ លើក ស្មើនឹង ៣ភាគរយ អ្នកស្លាប់កើន ៦២ នាក់ ស្មើនឹង ១០ភាគរយ និងអ្នករបួសកើន ២០៩ នាក់ ស្មើនឹង ១៥ភាគរយ បើប្រៀបធៀបនឹងរយៈពេលដូចគ្នានៅឆ្នាំ២០២៤។
ជាពិសេស ក្នុងខែមករា ដើមឆ្នាំ២០២៦ បើប្រៀបធៀបនឹងខែមករា ឆ្នាំ២០២៥ គ្រោះថ្នាក់ចរាចរណ៍បានកើនឡើង ៤២ លើក ស្មើនឹង ១៩ភាគរយ អ្នកស្លាប់កើន ២៥ នាក់ ស្មើនឹង ១៨ភាគរយ និងអ្នករបួសកើន ៦៤ នាក់ ស្មើនឹង ២៣ភាគរយ។ មូលហេតុចម្បងនៃគ្រោះថ្នាក់រួមមាន ការបើកបរលើសល្បឿន ៤៧ភាគរយ មិនគោរពសិទ្ធិ ២១ភាគរយ មិនប្រកាន់ស្តាំ ១០ភាគរយ ប្រជែងគ្រោះថ្នាក់ ៧ភាគរយ បត់គ្រោះថ្នាក់ ៦ភាគរយ ការបើកបរស្រវឹង ៣ភាគរយ និងកត្តាផ្សេងៗទៀត។
អគ្គស្នងការដ្ឋាននគរបាលជាតិ បានបញ្ជាក់ថា ការរឹតបន្តឹងការអនុវត្តច្បាប់នេះ គឺដើម្បីចូលរួមអនុវត្តយុទ្ធសាស្ត្របញ្ចកោណរបស់រាជរដ្ឋាភិបាល ក្នុងនីតិកាលទី៧ នៃរដ្ឋសភា និងសម្រេចគោលដៅផែនការទស្សវត្សរ៍សុវត្ថិភាពចរាចរណ៍ផ្លូវគោក ឆ្នាំ២០២០–២០៣០ ឱ្យទទួលបានជោគជ័យ។
ជាមួយគ្នានេះ អគ្គស្នងការដ្ឋាននគរបាលជាតិ អំពាវនាវឱ្យក្រសួង ស្ថាប័ន វិស័យឯកជន សង្គមស៊ីវិល និងសាធារណជនគ្រប់រូប ដែលជាអ្នកប្រើប្រាស់ផ្លូវ ចូលរួមគោរពច្បាប់ចរាចរណ៍ដោយស្មារតីទទួលខុសត្រូវ និងការប្រុងប្រយ័ត្នខ្ពស់ ដើម្បីរួមចំណែកកាត់បន្ថយគ្រោះថ្នាក់ចរាចរណ៍ អ្នកស្លាប់ អ្នករបួស និងការខូចខាតទ្រព្យសម្បត្តិ ស្របតាមពាក្យស្លោក «ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍»។
