ព្រឹកថ្ងៃទី១៧ ខែមករា ឆ្នាំ២០២៦ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជួបសំណេះសំណាល សួរសុខទុក្ខ និងចែកអំណោយមនុស្សធម៌ជូនប្រជាជនភៀសសឹកចំនួន ២.២០៥គ្រួសារ ស្មើនឹង ៦.៧៤៦នាក់ ដែលកំពុងស្នាក់នៅបណ្តោះអាសន្នក្នុងស្រុកក្រឡាញ់ ខេត្តសៀមរាប។
ប្រជាជនភៀសសឹកទាំងនេះ មកពីខេត្តចំនួន៥ រួមមាន ឧត្តរមានជ័យ ១.៩១៧គ្រួសារ, បន្ទាយមានជ័យ ១៧៤គ្រួសារ, បាត់ដំបង ១៨គ្រួសារ, ប៉ៃលិន ៤គ្រួសារ និងព្រះវិហារ ១គ្រួសារ ដែលស្នាក់នៅតាមមណ្ឌលសុវត្ថិភាពចំនួន ១៣ និងតាមផ្ទះសាច់ញាតិមួយចំនួន។
ក្នុងឱកាសនោះ ឯកឧត្តម ប្រាក់ សោភ័ណ អភិបាលខេត្តសៀមរាប និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានថ្លែងអំណរគុណចំពោះរាជរដ្ឋាភិបាលកម្ពុជា កាកបាទក្រហមកម្ពុជា និងជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ចំពោះសុខទុក្ខប្រជាពលរដ្ឋដោយមិនរើសអើង។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានពាំនាំនូវព្រះរាជបន្ទូល និងព្រះសវនីយ៍ផ្តាំផ្ញើសួរសុខទុក្ខពី ព្រះករុណា ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ ជូនដល់ប្រជាពលរដ្ឋទាំងអស់ ព្រមទាំងជូនពរឲ្យមានសុខភាពល្អ និងកម្លាំងចិត្តក្នុងការបន្តជីវភាពរស់នៅ។
សម្តេចកិត្តិព្រឹទ្ធបណ្ឌិត បានបញ្ជាក់ថា កាកបាទក្រហមកម្ពុជា នឹងបន្តបំពេញតួនាទីជាជំនួយការអាជ្ញាធរសាធារណៈក្នុងវិស័យមនុស្សធម៌ជានិច្ច ហើយអំណោយដែលបានចែកជូននៅថ្ងៃនេះ គឺបានមកពីការឧបត្ថម្ភរបស់សប្បុរសជនគ្រប់មជ្ឈដ្ឋាន។
អំណោយដែលគ្រួសារនីមួយៗទទួលបាន៖ អង្ករ ២៥គីឡូក្រាម,មី ១កេស,ឆៃប៉ូវ ២កំប៉ុង,ទឹកស៊ីអ៊ីវ ៦ដប និងទឹកត្រី ៦ដប,ប្រេងឆា ១ដប,ភេសជ្ជៈបាកាស ៦កំប៉ុង
,ឃីតសម្ភារ (សារុង ក្រមា មុង និងភួយ),នំប៉័ង ១ដើម,ទឹកបរិសុទ្ធ ១ដប,ថវិកា ៣ម៉ឺនរៀល ។
ជាមួយគ្នានេះ សម្តេចកិត្តិព្រឹទ្ធបណ្ឌិត ក៏បានអំពាវនាវឲ្យប្រជាពលរដ្ឋយកចិត្តទុកដាក់លើការថែរក្សាសុខភាព អនាម័យបរិស្ថាន ផឹកទឹកដាំឆ្អិន ប្រកាន់ខ្ជាប់ពាក្យស្លោក «ការពារ ប្រសើរជាងព្យាបាល» និងជំរុញឲ្យស្ត្រីមានផ្ទៃពោះទៅពិនិត្យសុខភាពតាមកាលកំណត់។
បន្ថែមពីនេះ សម្តេចកិត្តិព្រឹទ្ធបណ្ឌិត ក៏បានផ្តល់ស្បៀង និងសម្ភារបន្ថែមជូនរដ្ឋបាលខេត្តសៀមរាប សម្រាប់ប្រើប្រាស់តាមការចាំបាច់ និងបានអញ្ជើញប្រគេនទេយ្យទានដល់វត្តបូទុម្មរតនញ្ញាណ (វត្តស្រណាល) ដើម្បីគាំទ្រដល់ព្រះសង្ឃ និងសកម្មភាពសាសនា។
ប្រជាពលរដ្ឋភៀសសឹក បានសម្តែងក្តីរំភើប និងថ្លែងអំណរគុណយ៉ាងជ្រាលជ្រៅចំពោះទឹកចិត្តមនុស្សធម៌ និងការយកចិត្តទុកដាក់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខប្រជាពលរដ្ឋគ្រប់ពេលវេលា៕
