ព្រឹកថ្ងៃទី៣១ ខែមីនា ឆ្នាំ២០២៥ឯកឧត្តម គីម រិទ្ធី អភិបាលខេត្តព្រះវិហារ អញ្ជើញជាអធិបតីក្នុងពិធីប្រកាសចូលកាន់តំណែងអភិបាល នៃគណៈអភិបាលស្រុកឆែប ខេត្តព្រះវិហារ ដោយមានការចូលរួមពីលោកអភិបាលរងខេត្ត ប្រធានសាលាដំបូងខេត្ត ព្រះរាជអាជ្ញាអយ្យការអមសាលាដំបូងខេត្ត មេបញ្ជាការកងម្លាំងទាំងបី ប្រធានមន្ទីរ អង្គភាពពាក់ព័ន្ធ អភិបាលក្រុង ស្រុក និងថ្នាក់ដឹកនាំ មន្រ្តីរាជការចំណុះសាលាស្រុកឆែប ជាច្រើនរូប នៅសាលាស្រុកឆែប ខេត្តព្រះវិហារ។
ការផ្ដល់ទំនុកចិត្ត តែងតាំងមុខតំណែងនេះ គឺមិនត្រឹមតែជាការផ្ដល់ ឱកាសឱ្យបញ្ចេញសមត្ថភាព និងការលើកទឹកចិត្តនោះទេ តែវាក៏ជា ការផ្ដល់នូវអម្រែកមួយបន្ថែមទៀត ហេតុនេះ សូមលោក ឃិត សុធារ៉ា អភិបាលស្រុកឆែបថ្មីនេះ សូមបន្តខិតខំការអនុវត្តតួនាទី ភារកិច្ចរបស់ខ្លួន ឱ្យកាន់តែមានប្រសិទ្ធភាព និងមានការទទួលខុសត្រូវខ្ពស់ ព្រមទាំង រៀបចំលក្ខណៈសម្បត្តិនានា ក្នុងនាមជាថ្នាក់ដឹកនាំនិងបន្តខិតខំ សាងសមត្ថភាព និងការអភិវឌ្ឍខ្លួនឱ្យបានពេញ លេញក្នុងនាម ជាថ្នាក់ដឹកនាំស្រុកដើម្បីជួយការងារ រដ្ឋបាលស្រុក ឱ្យកាន់តែមានប្រសិទ្ធភាព រីកចម្រើនបន្ថែមទៀត។
ឯកឧត្ដម អភិបាលខេត្ត បានលេីកឡេីងថា ឆ្លៀតនៅក្នុងឱកាសនេះ ខ្ញុំសូមក្រើនរំលឹក និងលើកឡើងអំពីច្បាប់ ស្ដីពី ការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលក្នុងនោះ រដ្ឋបាលស្រុកគឺ ត្រូវបានគ្រប់គ្រងតាមគោលការណ៍នៃ រដ្ឋបាលឯកភាព ដោយមានក្រុមប្រឹក្សា និងគណៈអភិបាលស្រុកជាក្បាលម៉ាស៊ីនដឹកនាំរដ្ឋបាលស្រុក ហេតុនេះសូមបន្តពង្រឹង សាមគ្គីភាព កិច្ចសហការផ្ទៃក្នុង ពង្រឹងការអនុវត្ត តួនាទី ភារកិច្ច ស្របតាមច្បាប់ អនុក្រឹត្យ និងលិខិតបទដ្ឋានគតិយុត្តជាធរមាន ជាពិសេសគឺ អនុក្រឹត្យលេខ ២១៦ អនក្រ.បកស្តីពីតួនាទី ភារកិច្ច និងទំនាក់ទំនងការងារ របស់ក្រុមប្រឹក្សា គណៈអភិបាលខេត្ត ក្រុមប្រឹក្សា គណៈអភិបាលក្រុង និងក្រុមប្រឹក្សា គណៈអភិបាលស្រុក។
លេីសពីនេះទៀត ការអនុវត្តតួនាទី ភារកិច្ច របស់ក្រុមប្រឹក្សា និងគណៈអភិបាល គឺដូចជាឪពុក និងម្តាយនៅក្នុងគ្រួសារមួយដែល ត្រូវតែសហការ សាមគ្គីភាព ស្របតាមច្បាប់ និងលិខិតបទដ្ឋានគតិយុត្តជាធរមាន ដើម្បីចៀសវាងការកើតមានឡើងនូវបាតុភាពណាមួយ ឬការ រំលោភអំណាច ឬការអនុវត្តផ្ទុយពីបទប្បញ្ញាត្តិច្បាប់ លិខិតគតិយុត្ត ឬទង្វើមិនស្របច្បាប់ណាមួយ ដែលអាចឈានដល់ការរំសាយ ក្រុមប្រឹក្សា ដូចដែលមានចែងក្នុងមាត្រា២៤ មាត្រា៤៨ មាត្រា៤៩ មាត្រា៧៨ និងមាត្រា៧៩ នៃច្បាប់ ស្ដិពី ការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ។
លោក ឃិត សុធារ៉ា អភិបាលរងក្រុងព្រះវិហារ ត្រូវបានតែងតាំងជាអភិបាលស្រុកឆែប ខេត្តព្រះវិហារ ស្របពេលលោក ឡង់ សុបិន អភិបាលស្រុក ត្រូវផ្ទេរភារកិច្ចមកជាមន្រ្តីរាជការចំណុះរដ្ឋបាលខេត្តវិញ៕
