នៅព្រឹកថ្ងៃទី ៦ ខែកញ្ញា ឆ្នាំ២០២៥ បណ្ឌិត ទូច វណ្ណៈ បានបង្ហោះសារមួយលើផេកហ្វេសប៊ុកផ្លូវការ ក្រោមចំណងជើងថា “ខ្មែរនឹងកាន់តែឈឺចាប់ បើខ្មែរមិនជឿជាក់លើរាជរដ្ឋាភិបាល ឬខ្មែរបែកបាក់សាមគ្គីនោះ”។
ក្នុងសារនេះ បណ្ឌិត ទូច វណ្ណៈ បានលើកឡើងថា កងទ័ពថៃតែងតែបង្កហេតុ ដើម្បីបង្ខំឱ្យកងទ័ពកម្ពុជា ប្រើអាវុធជាមុន ហើយយកវាជាលេសវាយប្រហារវិញ។ ទោះជាយ៉ាងណា រាជរដ្ឋាភិបាលកម្ពុជា ក្រោមការដឹកនាំសម្តេចមហាបវរធិបតី ហ៊ុន ម៉ាណែត បានជ្រើសរើសដោះស្រាយតាមផ្លូវសន្តិវិធី ដោយប្រើការទូត និងយន្តការអន្តរជាតិ។
លោកបានរំលឹកថា កិច្ចព្រមព្រៀងឈប់បាញ់កម្ពុជា-ថៃ ត្រូវបានចុះហត្ថលេខានៅថ្ងៃទី ២៨ កក្កដា ២០២៥ ក្នុងប្រទេសម៉ាឡេស៊ី ក្រោមការសម្របសម្រួលរបស់នាយករដ្ឋមន្ត្រីម៉ាឡេស៊ី និងដោយគំនិតផ្តួចផ្តើមពីប្រធានាធិបតីសហរដ្ឋអាមេរិក ដូណាល់ ត្រាំ។ ប្រទេសចិនក៏បានចូលរួមអង្កេតតាមដានផងដែរ។
បន្ថែមពីនេះ កម្ពុជាក៏បានសម្រេចដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ (ICJ) អំពីជម្លោះតំបន់ប្រាសាទតាមាន់ធំ តាមាន់តូច និងតាក្របី ទោះបីជាភាគីថៃប្រកាសប្រឆាំងក្តី។
លោកបណ្ឌិត ទូច វណ្ណៈ បានសរសេរថា កងទ័ពកម្ពុជា គោរពតាមបទបញ្ជារបស់រាជរដ្ឋាភិបាល មិនមានសកម្មភាពផ្ទាល់ខ្លួន ដូចកងទ័ពថៃទេ ខណៈដែលប្រជាពលរដ្ឋខ្មែរ ក៏បានបង្ហាញសាមគ្គីភាព និងជំនឿលើរាជរដ្ឋាភិបាល ដោយចូលរួមជួយកងទ័ព និងជនរងគ្រោះ។
ចុងបញ្ចប់ លោកបានអំពាវនាវឲ្យប្រជាពលរដ្ឋខ្មែររក្សាសាមគ្គីភាព និងកុំឲ្យជឿតាមព័ត៌មានបង្ខូចស្មារតី ដោយរំលឹកសុភាសិតខ្មែរ៖ “ខ្មែរសាមគ្គី ខ្មែរឈ្នះ ខ្មែរបែកបាក់សាមគ្គី ខ្មែរចាញ់”។
