លោកស្រី ផៃថងថាន ស៊ីណាវ៉ាត្រា គឺជានាយករដ្ឋមន្ត្រីគណបក្សភឿថៃទី២ ដែលត្រូវបានតុលាការធម្មនុញ្ញថៃពិឃាតអាជីពនយោបាយចោល ក្រោយអង្គុយអសនៈនេះ បានត្រឹមរយៈពេល១០ខែ១៥ថ្ងៃ ។
លោកស្រី ផៃថងថាន ដែលបានអង្គុយកៅអីនាយករដ្ឋមន្ត្រីពីថ្ងៃទី១៦ ខែសីហា ឆ្នាំ២០២៤ បន្តពីលោក ស្រ៊ីថា ថាវេស៊ីន ដែលអង្គុយបានអង្គុយកៅអីនេះ បានត្រឹម១១ខែ២៣ថ្ងៃ បានអស់សិទ្ធិតាំងពីថ្ងៃដែលត្រូវតុលាការធម្មនុញ្ញព្យូរតំណែង កាលចាប់ពីថ្ងៃទី០១ ខែកក្កដា ហើយនៅថ្ងៃទី២៩ ខែសីហា ក៏សម្រេចដកតំណែងលោកស្រីតែម្តង ។
តាមសេចក្តីរាយការណ៍របស់ទូរទស្សន៍BBC លោកស្រីត្រូវបានតុលាការសម្រេចថា ខ្លឹមសារនៃការសន្ទនាតាមទូរស័ព្ទដ៏ចម្រូងចម្រាស់របស់លោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា គឺជាការបំពានក្រមសីលធម៌ជាមេដឹកនាំថៃ ។
នៅក្នុងប្រវត្តិសាស្ត្រនៃការតស៊ូនយោបាយនៅថៃនៅក្នុងរយៈពេល២០ឆ្នាំចុងក្រោយ លោកស្រី ផៃថងថាន ត្រូវបានគេដឹងថា គឺជាមេដឹកនាំថៃទី៥ ដែលត្រូវបានតុលាការធម្មនុញ្ញថៃបញ្ចប់តំណែងចាប់តាំងពីលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលត្រូវបញ្ចប់តំណែងដោយរដ្ឋប្រហារយោធាកាលពីឆ្នាំ២០០៦ ធ្វើការតស៊ូដើម្បីអំណាចជាបន្តបន្ទាប់នៅក្រៅប្រទេស
រហូតបានវិលមកវិញកាលពីឆ្នាំ២០២៣ ។
នៅក្រោមស្រមោលនៃអំណាចលោកថាក់ស៊ីន តុលាការធម្មនុញ្ញថៃបានបញ្ចប់តំណែងនាយករដ្ឋមន្ត្រីដែលរួមមាន លោក សាម៉ាក់ ស៊ុនដារ៉ាវេ (Samak Sundaravej) ដែលកាន់តំណែងពីខែមករា ដល់ខែកញ្ញា ឆ្នាំ២០០៨ ។ ក្រោយមកគឺលោក ស៊ុមឆៃ វង្សសាវ៉ាត (Somchai Wongsawat) ពីខែកញ្ញាដល់ខែធ្នូ ឆ្នាំ២០០៨ ។ លោកស្រី យីងឡាក់ ស៊ីណាវ៉ាត្រា (Yingluck Shinawatra) ពីខែសីហា ឆ្នាំ២០១១ ដល់ ខែឧសភា ឆ្នាំ២០១៤ ។ ហើយបន្ទាប់មកគឺ លោក ស្រ៊ីថា ថាវេស៊ីន (Srettha Thavisin) ពីខែសីហាឆ្នាំ២០២៣ ដល់ខែសីហា ឆ្នាំ២០២៤ ។
អាជីពនយោបាយរបស់លោកស្រី ផៃថងថាន ត្រូវបានពិឃាតដោយចៅក្រម៦រូបនៅក្នុងចំណោមចៅក្រម៩ រូប ក្រោយពេលដែលសមាជិកព្រឹទ្ធសភា៣៦រូបប្តឹងលោកស្រី ។ ក្រោយសាលក្រមត្រូវបានប្រកាសលោកស្រីបានថ្លែងទទួលស្គាល់សាលក្រមរបស់តុលាការ ប៉ុន្តែបាននិយាយថា ក្នុងនាមជាជនជាតិថៃ លោកស្រីសូមបញ្ជាក់ពីភាពស្មោះត្រង់របស់លោកស្រី ដែលបានធ្វើការឲ្យប្រទេសជាតិ ។
តើនរណាអាចជាមេដឹកនាំថៃបន្ទាប់ពីលោកស្រី ផៃថងថាន ដែលទើបតែអស់តំណែង?
នៅក្នុងអំឡុងពេលអន្តរកាលនេះ លោក ភូមថាំ វិឆាយ៉ាឆៃ នាយករដ្ឋមន្ត្រីស្តីទីនឹងនៅតែបន្តតំណែងជានាយករដ្ឋមន្ត្រីចាំផ្ទះសិន ប៉ុន្តែថៃដាច់ខាតត្រូវតែបោះឆ្នោតជ្រើសរើសតំណែងនាយករដ្ឋមន្ត្រីថ្មី បើមិនដូច្នេះទេ ក៏ត្រូវរំលាយសភាដើម្បីបោះឆ្នោតជាថ្មី ។
នៅក្នុងជំហានដំបូង ប្រសិនបើត្រូវបោះឆ្នោតជ្រើសរើសនាយករដ្ឋមន្ត្រីចេញពីគណបក្សដែលមានអសនៈនៅក្នុងសភា បេក្ខជនដែលគេគិតថា សក្តិសមគឺមាន៥រូប ដោយនៅក្នុងនោះ គឺលោក ឆៃកាសេម នីទិស៊ីរ៊ី (Chaikasem Nitisiri) មកពីគណបក្សភឿថៃ ហើយជាអ្នកដែលទំនាក់ទំនងជិតដិតនឹងលោក ថាក់ស៊ីន ។
ក្រៅពីនោះ គឺមាន លោក អានុទិន ឆានវីរ៉ាគុល (Anutin Charnvirakul) មេដឹកនាំគណបក្ស ភូមិចៃថៃ ដែលធ្លាប់កាន់តំណែងជាឧបនាយករដ្ឋមន្ត្រីនិងជារដ្ឋមន្ត្រីមហាផ្ទៃ តែក៏មានបញ្ហាចម្រូងចម្រាស់នឹងភឿថៃ រហូតដល់ បានលាលែងពីក្រុមចម្រុះកាន់អំណាចក្រោយបែកធ្លាយករណីសន្ទនារវាងលោកស្រី ផៃថងថាន ដែលជាដើមចមនៃការអស់អំណាចនេះ ។
បេក្ខជនបន្ទាប់គឺលោក ឧត្តមសេនីយ ប្រាយុទ្ធ ចាន់អ៊ូចា អតីតនាយករដ្ឋមន្ត្រីដែលបានចូលនិវត្តន៍ពីនយោបាយនៅឆ្នាំ ២០២៣ ប៉ុន្តែទោះ លោកនៅតែឥទ្ធិពលនៅក្នុងគណបក្សដែលគាំទ្រដោយយោធា ។ ក្រៅពីនោះគឺ លោក ភីរ៉ាផាន សាលីរ៉ាតាវីបាហ្គា (Pirapan Salirathavibhaga ) ឧបនាយករដ្ឋមន្ត្រី និងជារដ្ឋមន្ត្រីថាមពល មកពីគណបក្សរួបរួមជាតិថៃ ហើយនិង លោក ជូរិន ឡាកសាណាវីសិទ្ធ (Jurin Laksanawisit) មកពីគណបក្សប្រជាធិបតេយ្យអភិរក្ស៕