សមត្ថកិច្ចប៉ុស្ដិ៍នគរបាលរដ្ឋបាលបែកចាន ស្រុកអង្គស្នួល ខេត្តកណ្ដាល បានឃាត់ខ្លួនជនសង្ស័យម្នាក់ ពាក់ព័ន្ធនឹងករណីបោកប្រាស់ពលករជាច្រើននាក់ តាមរយៈផេកហ្វេសប៊ុកឈ្មោះ «ប្រព័ន្ធដោះស្រាយការងារ» ដែលបានបន្សល់ទុកជនរងគ្រោះចំនួន ៧នាក់ និងអ្នកដាក់ពាក្យសុំការងារជាង ២៣នាក់ទៀត។
ហេតុការណ៍នេះកើតឡើងនៅវេលាម៉ោង ១៤ និង ៣០នាទី ថ្ងៃទី ០៧ ខែសីហា ឆ្នាំ ២០២៥ នៅភូមិបែកចាន ឃុំបែកចាន ស្រុកអង្គស្នួល ខេត្តកណ្ដាល។ បន្ទាប់ពីជនរងគ្រោះបានដាក់ពាក្យសុំការងារតាមផេកហ្វេសប៊ុក និងបង់ប្រាក់ជាច្រើន ដើម្បីសន្យាចូលធ្វើការនៅរោងចក្រ តែចុងក្រោយ ត្រូវបរាជ័យ និងមិនទទួលបានការងារទេ។
ទឹកប្រាក់សរុប ដែលជនរងគ្រោះ ៧នាក់បានបង់ទៅក្រុមជនសង្ស័យមានចំនួន ១,០៥០,០០០ រៀល។ ពួកគេត្រូវបង្វែរ ទៅជួលផ្ទះ និងបង់ប្រាក់កក់បន្ថែម តែស្រាប់តែពេលដល់ទីតាំងរោងចក្រ មានតែ ២នាក់ប៉ុណ្ណោះ ដែលត្រូវបានអនុញ្ញាតឱ្យធ្វើការ។ ដោយមានការសង្ស័យក្រុមខាងលើ ជនរងគ្រោះ បានទៅដាក់ពាក្យបណ្ដឹងនៅសមត្ថកិច្ច បច្ចុប្បន្ន សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ នួន រតនៈ (អាយុ ២១ ឆ្នាំ) ខណៈជនសង្ស័យ ៧នាក់ (ស្រី ២នាក់) កំពុងស្ថិតក្នុងការស្រាវជ្រាវ។
ក្នុងចំណោមអ្នកដាក់ពាក្យសុំការងារ មាន ២៣នាក់ (ស្រី ១១នាក់) ដែលសមត្ថកិច្ចបានជួយអន្តរាគមន៍ទាន់ពេលវេលា មិនឲ្យបង់ប្រាក់ឡើយ ហើយក៏បានត្រឡប់ទៅស្រុកកំណើតវិញដោយសុវត្ថិភាព។
សមត្ថកិច្ចកំពុងបន្តស្រាវជ្រាវ ដើម្បីបង្រ្កាបក្រុមជនសង្ស័យ និងផ្ដល់យុត្តិធម៌ដល់ជនរងគ្រោះ។ សូមប្រជាពលរដ្ឋចេះប្រុងប្រយ័ត្នមុនពេលជឿលើការផ្សព្វផ្សាយការងារតាមបណ្ដាញ បើមានសង្ស័យសូមជួយជូនដំណឹងសមត្ថកិច្ចភ្លាមៗ៕
