អង្គការយូណេស្កូ នៅថ្ងៃពុធ (ទី៣០ ខែកក្កដា) បានសម្តែងនូវការគាំទ្រចំពោះកិច្ចខិតខំប្រឹងប្រែងជាបន្តបន្ទាប់ ដើម្បីនាំមកនូវសន្តិភាពយូរអង្វែងរវាងកម្ពុជា និងថៃ ដោយលើកឡើងថា សន្តិភាពមានសារៈសំខាន់ណាស់ក្នុងការការពារសម្បត្តិបេតិកភណ្ឌវប្បធម៌នៃប្រទេសទាំងពីរ។ យូណេស្កូ មានក្ដីព្រួយបារម្ភជាខ្លាំង ពីព្រោះការប្រយុទ្ធគ្នាអាចបណ្តាលឱ្យខូចខាតដល់ទីតាំងវប្បធម៌សំខាន់ៗ រួមទាំងទីកន្លែងមួយចំនួនដែលទទួលស្គាល់ជាសម្បត្តិបេតិកភណ្ឌពិភពលោករបស់អង្គការយូណេស្កូ (UNESCO) ។
នៅក្នុងការជួយតាមដានស្ថានការណ៍ អង្គការយូណេស្កូបានចាប់ផ្តើមប្រើប្រាស់រូបភាពផ្កាយរណប ដើម្បីមើលទីតាំងបេតិកភណ្ឌវប្បធម៌។ ខ្លួនក៏បានចែករំលែកទីតាំងជាក់លាក់នៃប្រាសាទទាំងនេះជាមួយប្រទេសទាំងពីរ ដើម្បីជួយទប់ស្កាត់គ្រោះថ្នាក់បន្ថែមទៀត ។
អង្គការយូណេស្កូបានក្រើនរម្លឹកភាគីទាំងសងខាងអំពីទំនួលខុសត្រូវរបស់ពួកគេ ក្នុងការអនុវត្តតាមច្បាប់អន្តរជាតិដែលការពារទីកន្លែងវប្បធម៌ និងប្រវត្តិសាស្ត្រក្នុងអំឡុងមានជម្លោះ។ ទាំងនេះរួមបញ្ចូលអនុសញ្ញាទីក្រុងឡាអេ ឆ្នាំ ១៩៥៤ និងអនុសញ្ញាឆ្នាំ ១៩៧២ ស្តីពីសម្បត្តិបេតិកភណ្ឌពិភពលោក ។
សំណេរជាចុងក្រោយនៅលើគេហទំព័ររបស់ខ្លួន អង្គការយូណេស្កូ និយាយថា អង្គការត្រៀមខ្លួនរួចជាស្រេចក្នុងការផ្ដល់ជំនួយបច្ចេកទេសចាំបាច់ដើម្បីធានាការពារទីតាំង រួមទាំងពិនិត្យវាយតម្លៃលើតួលេខនៃការខូចខាត និងអនុវត្តវិធានការការពារដ៏ចាំបាច់ ៕
https://whc.unesco.org/en/news/2802
