លេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) បានចេញសេចក្តីប្រកាសអំពីលទ្ធផលប្រតិបត្តិការចុងក្រោយ ដែលបានអនុវត្តតាំងពីថ្ងៃទី ២៧ មិថុនា ដល់ថ្ងៃទី ២២ កក្កដា ២០២៥។ ប្រតិបត្តិការទូទាំងប្រទេស ដឹកនាំដោយគណៈបញ្ជាការរាជធានីខេត្តទាំង២៥ បន្តអនុវត្តបទបញ្ជាលេខៈ០១បប របស់រាជរដ្ឋាភិបាលកម្ពុជា ចេញថ្ងៃទី ១៥ កក្កដា ២០២៥ ស្តីពីការបង្ក្រាបឆបោកតាមបច្ចេកវិទ្យា។
អាជ្ញាធរបានចុះត្រួតពិនិត្យ និងបោសសម្អាតសកម្មភាពឆបោកសរុប ១៣៨ ទីតាំង ១៧រាជធានី-ខេត្ត រួមមាន ភ្នំពេញ កណ្តាល ព្រះសីហនុ កំពង់ស្ពឺ បន្ទាយមានជ័យ ក្រចេះ ពោធិ៍សាត់ កំពត កោះកុង ឧត្តរមានជ័យ ស្ទឹងត្រែង មណ្ឌលគីរី ប៉ៃលិន តាកែវ ស្វាយរៀង សៀមរាប និងត្បូងឃ្មុំ។ ការបង្ក្រាបបានសរុប ៥៨ ករណី ក្នុងនោះមាន ១៩ ករណី ជាការឃាត់រថយន្តដឹកជនបរទេស។ សង្គ្រោះជនរងគ្រោះជា ជនជាតិវៀតណាមចំនួន ១៥៣ នាក់ (ស្រី ១៨) នៅខេត្តពោធិ៍សាត់ ។
ក្នុងចំណោមការបង្ក្រាបនេះ មានជនសង្ស័យសរុប ៣,០៧៥ នាក់ (ស្រី ៦០៦) ត្រូវបានឃាត់ខ្លួន។ ជនសង្ស័យមានសញ្ជាតិចិនចំនួន ១,០២៨ នាក់ (ស្រី ៨៩), វៀតណាម ៦៩៣ នាក់ (ស្រី ១៩០), ឥណ្ឌូនេស៊ី ៣៦៦ នាក់ (ស្រី ៧០), ឥណ្ឌា ១០៥ នាក់ (ស្រី ៩), បង់ក្លាដេស ១០១ នាក់ (ស្រី ២៧), ថៃ ៨២ នាក់ (ស្រី ១៣), កូរ៉េ ៥៧ នាក់ (ស្រី ២), ប៉ាគីស្ថាន ៨១ នាក់ (ស្រី ៣) និងជនជាតិផ្សេងទៀតពីប្រទេសអាស៊ាន និងអាហ្វ្រិក។
អាជ្ញាធរបានដកហូតវត្ថុតាងសំខាន់ៗ ដូចជា កុំព្យូទ័រ ទូរសព្ទដៃ សម្លៀកបំពាក់ប៉ូលិសចិន អាវុធ គ្រាប់កាំភ្លើង ថ្នាំញៀន និងឧបករណ៍កែច្នៃគ្រឿងញៀន។ ក្រុមមេក្លោងចំនួន ១១ នាក់ ត្រូវបានបញ្ជូនទៅតុលាការ ដែល ៨ នាក់ ត្រូវបានចេញដីកាឃុំខ្លួនបណ្តោះអាសន្ន។
សមត្ថកិច្ចក៏បានសហការជាសហការជាមួយអគ្គនាយកដ្ឋានអន្តោប្រវេសន៍ ដើម្បីត្រៀមរៀបចំបញ្ជូនជនបរទេសទៅកាន់មណ្ឌលរង់ចាំត្រៀមបណ្ដេញចេញទៅប្រទេសសាមី។
