ធ្លាប់តែកូនស្ដាប់បង្គាប់ឪពុកម្ដាយ យុវជនវ័យ១៧ឆ្នាំម្នាក់រស់នៅសង្កាត់ឬស្សីកែវ បានចែករំលែកបទពិសោធដ៏អាក្រក់មួយរបស់ខ្លួន ដែលប្រើប្រាស់គ្រឿងញៀន និងបង្កអំពើហិង្សាលើម្ដាយខ្លួនឯង។រៀបរាប់ ប្រាប់មន្រ្តីព័ត៌មាន នៃក្រុមអ្នកនាំពាក្យក្រសួងមហាផ្ទៃ ក្នុងកិច្ចសម្ភាសនៅបណ្ណាល័យពន្ធនាគាររាជធានីភ្នំពេញ (PJ) យុវជនសម្បុរខ្មៅ ភ្នែកលឿងបន្តិច បានរម្លឹកថា ខ្លួនបានដើរលេងជាមួយពីមិត្តរួមការងារ ហើយក៏នាំគ្នាប្រើប្រាស់គ្រឿងញៀន ដោយសារចង់សាក ចង់ដឹង និងនិយមតាមបនភឿនដែលអះអាងថាវានាំឱ្យមានអារម្មណ៍សប្បាយ។
ចូលអន្ទាក់គ្រឿងញៀនបាន៣ខែ យុវជនរូបនេះ អះអាងថាខ្លួន ហាក់ភ្ញាក់រលឹក ក៏បានលាលែងពីកន្លែងការងារ ដើម្បីគេចពីបនភឿន មករស់នៅជាមួយម្ដាយ ប៉ុន្តែការចាកឆ្ងាយពីគ្រឿងញៀន បានធ្វើឱ្យខ្លួននៅមិនសុខ ចេះតែខឹង មួរម៉ៅ និងបានអះអាងទៀតថា «នរណាមើលមុខ នរណានិយាយច្រើន ដាក់ខ្ញុំក៏បានដែរ»។ ពាក់អាវពណ៌ទឹកក្រូច អង្គុយនិយាយទាំងមានមន្រ្តីពន្ធនាគារឈរតាមដានសកម្មភាពក្នុងបទសម្ភាស យុវជនរូបនេះ បានអះអាងថា ដើមហេតុនាំឱ្យមានការប្រើប្រាស់អំពើហិង្សាលើម្ដាយ គឺដោយសារតែម្ដាយនិយាយរអ៊ូរទាំ ប្រើប្រាស់ពាក្យសម្ដីជេរប្រមាទមកលើខ្លួន និងហាមឃាត់កុំដើរលេងដាច់យប់ជាមួយមិត្តភក្តិដោយខ្លាចនាំឱ្យប្រើប្រាស់គ្រឿងញៀនទៀត។ «វាពិតជាអាក្រកណាស់» យុវជនលាត់មាត់ស្ដីបន្ទោសខ្លួនឯង ដោយបន្តទៀតថា «នៅពេលឮបែបនោះ គឺខ្ញុំដឹងតែពីខឹង……ក៏ឈានទៅវាយតប់ និងច្រានគាត់ឱ្យដួល….»។
គឺសកម្មភាពក្រោមអំណាចគ្រឿងញៀននេះហើយដែលយុវជនរូបនេះ ត្រូវសមត្ថកិច្ចឃាត់ខ្លួន បញ្ជូនទៅតុលាការ មុននឹងមកស្ថិតក្រោមការឃុំឃាំងនៅពន្ធនាគារPJ។ រៀបរាប់ទាំងអស់សង្ឃឹម លាយឡំនឹងទឹកភ្នែក យុវជនដដែល បានបន្ថែមទៀតថា ពេលបញ្ជូនមកដល់ពន្ធនាគារ ដំបូងខ្លួនមានអារម្មណ៍ថាភ័យខ្លាចជាខ្លាំង និងកាន់តែមានវិប្បដិសារីជាខ្លាំងលើសកម្មភាពរបស់ខ្លួន ហើយប៉ុន្មានខែមកនេះ ខ្លួនគ្មានសាច់ញាតិណាម្នាក់មកសួរសុខទុក្ខនោះទេ។
នៅពេលសួរថាចង់ឱ្យម្ដាយមកមើលទេ? យុវជនរូបនេះបានទម្លាក់ទឹកមុខចុះ ហើយបែរមុខចេញដោយយកដៃជូតទឹកភ្នែក។ តាមរយៈបទសម្ភាសជាមួយក្រុមការងារ យុវជនរូបនោះបានបង្ហាញពីក្ដីសង្ឃឹមថា«កុំធ្វើដូចខ្ញុំអី! ខ្ញុំខំគេចពីវាហើយតែវានៅតាមធ្វើបាបខ្ញុំ រហូតខ្ញុំមានទោសព្រោះវាយម្ដាយ។ ដកខ្លូនទៅ ពីគ្រឿងញៀន វាអាក្រក់ណាស់….ឥឡូវ ខ្ញុំជាប់ឃុំអស់រយៈពេល៤ខែហើយ ពុំមានអ្នកណាមកសួរសុខទុក្ខខ្ញុំទេ។ ខ្ញុំពិតជាខុសធ្ងន់ដែលលើកដៃវាយម៉ាក់ដូច្នេះ! ម៉ាក់! បើម៉ាក់បានអាន ឬឃើញវីដេអូនេះ សូមម៉ាក់មកមើលខ្ញុំផង កូនដឹងកំហុសហើយ…»៕
សូមរង់ចាំទស្សនាកិច្ចសម្ភាសពិសេសរវាងក្រុមមន្ត្រីព័ត៌មាននៃក្រុមអ្នកនាំពាក្យក្រសួងមហាផ្ទៃ និងយុវជនខាងលើដែលនឹងចេញផ្សាយឆាប់ៗនេះ…! កញ្ញា សេង សុខហ៊ុន មន្រ្តីព័ត៌មានក្រុមអ្នកនាំពាក្យក្រសួងមហាផ្ទៃ
ការលើកឡើងបែបនេះក្នុងឱកាសដែលឯកឧត្តមអភិសន្តិបណ្ឌិត អញ្ជើញជាអធិបតីក្នុងពិធីផ្សព្វផ្សាយរបាយការណ៍ជាតិស្តីពីលទ្ធផលការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅឆ្នាំ២០២៥ របស់ គ.ជ.ប.ជ នាព្រឹកថ្ងៃទី២៧ ខែមីនា ឆ្នាំ២០២៥នៅសាលប្រជុំ នៃទីស្តីការក្រសួងមហាផ្ទៃ។
ប្រមុខក្រសួងមហាផ្ទៃបានលើកឡើងថា ពិធីផ្សព្វផ្សាយលទ្ធផលការងាររបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ត្រូវបានធ្វើឡើងជាប្រចាំ ដើម្បីចែកជូនសាធារណជន អ្នកសារព័ត៌មានជាតិ និងអន្តរជាតិ បានជ្រាបអំពីកិច្ចខិតខំប្រឹងប្រែងក្នុងការបង្ការ ទប់ស្កាត់ ឈានទៅលុបបំបាត់អំពើជួញដូរមនុស្ស រហូតទទួលលទ្ធផលដ៏ធំធេងនេះ។ លទ្ធផលនេះក៏ជាការបង្ហាញនូវឆន្ទៈរួម និងកម្លាំងសរុប ដែលគ្រប់ភាគីពាក់ព័ន្ធ ទាំងរាជរដ្ឋាភិបាល ទាំងអង្គការមិនមែនរដ្ឋាភិបាលជាតិនិងអន្តរជាតិ ទាំងវិស័យសាសនា និងវិស័យឯកជន បាននាំគ្នាពុះពារគ្រប់ឧបសគ្គ និងភាពប្រឈមទាំងឡាយ ដើម្បីធ្វើឱ្យសម្រេចនូវលទ្ធផលនេះ។
ទន្ទឹមនឹងឱកាសបុណ្យចូលឆ្នាំថ្មីប្រពៃណីជាតិខ្មែរជិតឈានចូលមកដល់ ឯកឧត្តមអភិសន្តិបណ្ឌិតបានមានប្រសាសន៍លើកទឹកចិត្តដល់បណ្តាខេត្តជាប់ព្រំដែនទាំងអស់ ជាពិសេសខេត្តជាប់ព្រំដែនថៃ ដែលមានពលករច្រើនជាងគេ គឺត្រូវត្រៀមលក្ខណៈក្នុងការបង្ការ ទប់ស្កាត់ឱ្យបាន ព្រោះកន្លងទៅ ឯកឧត្តមបានសង្កេតឃើញថា នៅតែមានប្រជាពលរដ្ឋវិលមកវិញមួយចំនួនតូចឆ្លងកាត់ដោយខុសច្បាប់ ដែលនេះទាមទារឱ្យមានការត្រួតពិនិត្យឱ្យបានច្បាស់លាស់ ដើម្បីគ្រប់គ្រងឱ្យបានជនអន្តោប្រវេសន៍ និងពលករចេញ-ចូល ដោយស្របច្បាប់។
ឯកឧត្តមបន្តទៀតថា ប្រទេសកម្ពុជា ក៏ជាប្រទេសមួយដែលរងគ្រោះដោយការគំរាមកំហែងពីបទល្មើសឆ្លងដែន មានជាអាទិ៍បទល្មើសជួញដូរមនុស្ស បទល្មើសជួញដូរចែកចាយគ្រឿងញៀន និងបទល្មើសឆបោកតាមប្រព័ន្ធបច្ចេកវិទ្យាជាដើម។ ក្នុងនោះសមត្ថកិច្ចកម្ពុជា បានធ្វើប្រតិបត្តិការបង្ក្រាបមុខសញ្ញា និងទីតាំងដែលសង្ស័យថាប្រព្រឹត្តបទល្មើសជាបន្តបន្ទាប់ ហើយបានសហការជាមួយស្ថានទូត ឬស្ថានតំណាងបេសកកម្ម នៃបណ្តាប្រទេសពាក់ព័ន្ធ ដើម្បីដោះស្រាយបញ្ហាប្រជាពលរដ្ឋរបស់ខ្លួន ដែលត្រូវបានរកឃើញនៅកម្ពុជា និងចាប់ខ្លួនជនសង្ស័យបញ្ជូនទៅតុលាការ។
ជាមួយគ្នានោះប្រមុខក្រសួងមហាផ្ទៃ បានលើកទឹកចិត្ត និងថ្លែងអំណរគុណគ្រប់កិច្ចសហការពីសមត្ថកិច្ចជំនាញ និងស្ថានទូត ឬស្ថានតំណាងនៃបណ្តាប្រទេស ក្នុងនោះមានសហរដ្ឋអាមេរិក ប្រទេសញ៉ូសេឡែន ប៉ូឡូញ បែលហ្ស៊ិក ចក្រភពអង់គ្លេស ប្រទេសអូស្រ្តាលី សាធារណរដ្ឋកូរ៉េ ឥណ្ឌា វៀតណាម ចិន ហ្វីលីពីន ឥណ្ឌូនេស៊ី ជប៉ុន ថៃ ប្រទេសម៉ាឡេស៊ីជាដើម ដែលសកម្មភាពនេះបានបង្ហាញ អំពីកិច្ចសហការល្អ ក្នុងការឆ្លើយតបទៅនឹងអំពើជួញដូរមនុស្ស កាន់តែមានប្រសិទ្ធភាព។
យោងតាមរបាយការណ៍ជាតិស្តីពីលទ្ធផលការងារប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅឆ្នាំ២០២៥ របស់គ.ជ.ប.ជ រាជរដ្ឋាភិបាលកម្ពុជា នីតិកាលទី៧ បានចាត់ទុកការប្រយុទ្ធប្រឆាំងអំពើជួញដូរមនុស្ស ជាកិច្ចការអាទិភាព មួយក្នុងចំណោមការងារអាទិភាពដទៃទៀត រួមមានការដោះស្រាយផលប៉ះពាល់នៃគ្រឿងញៀន គ្រឿងស្រវឹង គ្រោះថ្នាក់ ចរាចរណ៍ និងបានដាក់ចេញនូវយុទ្ធសាស្ត្រឆ្លើយតបកាន់តែមានប្រសិទ្ធភាព ដោយខិតខំជំរុញសកម្មភាពឥតឈប់ឈរ ដើម្បីការពារសុវត្ថិភាព និងសន្តិសុខមនុស្ស ក៏ដូចជាសន្តិសុខជាតិទាំងមូល សម្រាប់ទ្រទ្រង់ដំណើរការអភិវឌ្ឍន៍ជាតិគ្រប់វិស័យ៕