ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២១ ខែឧសភា ឆ្នាំ២០២៥នេះ បានមានប្រសាសន៍ កាលពីថ្ងៃម្សិលមិញ សម្តេចបានចុះហត្ថលេខា លើអនុក្រឹត្យមួយ ដែលគិតគូរពីកង្វះមន្ត្រី លើវិស័យសំខាន់២ គឺវិស័យអប់រំ និងសុខាភិបាល នៅមូលដ្ឋាន។ សម្តេចថា អនុក្រឹត្យថ្មីនេះជាការរៀបចំនិយាមថ្មី ដើម្បីបើកច្រកជ្រើសរើសបន្ថែមទៀត នូវអ្នកដែលមានគុណវុឌ្ឍិ ចូលជាក្របខណ្ឌកុងត្រា ដែលជាកិច្ចសន្យាបច្ចេកទេស ទទួលបានអត្ថប្រយោជន៍ស្រដៀងនឹងមន្ត្រីក្របខណ្ឌ ប៉ុន្តែមិនមែនជាមន្ត្រីក្របខណ្ឌនោះទេ ហើយក៏មិនជាប់ក្នុងលក្ខខណ្ឌអាយុនោះដែរ ក្នុងករណីពួកគាត់លើអាយុ។
មានប្រសាសន៍ក្នុងឱកាស អញ្ជើញសម្ពោធសមិទ្ធផលកំណែទម្រង់វិទ្យាស្ថានជាតិអប់រំ និងប្រគល់សញ្ញាបត្រជូនដល់និស្សិត គរុនិស្សិត នៃវិទ្យាស្ថានជាតិអប់រំ, សម្តេចបន្តថា ការអនុវត្តនិយាមថ្មីនេះ គឺសាកល្បងលើវិស័យអប់រំ ពីថ្នាក់មតេ្តយ្យ ដល់ថ្នាក់ទី១២ និងវិស័យសុខាភិបាល រាប់ចាប់ពីប៉ុស្តិ៍សុខភាព រហូតដល់មន្ទីរពេទ្យបង្អែកស្រុក។
សម្តេចបញ្ជាក់ថា ការធ្វើបែបនេះ គឺដោយសារនៅតាមសាលារៀន តាមស្រុកមួយចំនួនខ្វះគ្រូបង្រៀន តែមានអ្នកដែលមានសក្តានុពល ហើយបើប្រើប្រាស់និយាមពីមុន បើឱ្យក្របខណ្ឌគឺគាត់លើសអាយុ តែបើឱ្យមន្ត្រីកិច្ចសន្យាធម្មតា ទទួលបានប្រាក់ខែតិចពេក គឺពួកគាត់មិនចូលធ្វើនោះទេ នេះជាមូលហេតុដែលសម្តេចសម្រេចចុះហត្ថលេខា លើអនុក្រឹត្យថ្មីនេះ។
ប៉ុន្តែយ៉ាងក្តី សម្តេចមហាបវរធិបតី បានណែនាំឱ្យការជ្រើសរើសនេះ ត្រូវតែអនុវត្តតាមនិយាម “រើសឱ្យត្រូវ បំពេញឱ្យត្រូវ និងរក្សាឱ្យនៅ” ពោលគឺត្រូវតែប្រាកដថា ជាមន្ត្រីដែលមានគុណភាព ដើម្បីពង្រឹងវិស័យអប់រំ និងសុខាភិបាលរបស់កម្ពុជា ឱ្យកាន់តែមានភាពរីកចម្រើនបន្ថែមទៀត។ សម្តេចនាយករដ្ឋមន្ត្រី បញ្ជាក់ថា បំពេញបរិមាណនៃតម្រូវការខ្វះខាតមន្ត្រី សូមកុំចោលនូវគុណភាព ដោយត្រូវមាននិយាម និងស្តង់ដារច្បាស់លាស់ សម្រាប់វិស័យអប់រំ និងសុខាភិបាល។
ជាមួយគ្នានោះ សម្តេចធិបតី ក៏បានមានភាពសប្បាយរីករាយផងដែរ ដោយមើលឃើញថា ក្មេងៗកម្ពុជាកាន់តែច្រើន បានចូលរួមនៅក្នុងការអានសៀវភៅ។ ជាមួយគ្នានោះ សម្តេចបានសង្កេតឃើញដែរថា ការលក់សៀវភៅសម្រាប់អាន ក៏មានការគាំទ្រច្រើនផងដែរ នាពេលបច្ចប្បន្ន។
សម្តេចចាត់ទុក ការអានច្រើន គឺជាការឱ្យតម្លៃទៅលើការសរសេរ និងការគិតគូរនៃការអប់រំ បែបរស់រវើក។ ក្នុងន័យនេះ សម្តេចអំពាវនាវ ដល់ប្រជាពលរដ្ឋ ជាពិសេសយុវជន ឱ្យមានការចូលរួមកាន់តែច្រើនថែមទៀត ក្នុងការអាន ដើម្បីបង្កើនចំណេះដឹង និងធ្វើឱ្យសង្គមជាតិ កាន់តែមានភាពរីកចម្រើន៕
