សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត បានអញ្ជើញអបអរសាទរព្រឹត្តិការណ៍នៃការចុះ”បូជនីយដ្ឋានចងចាំ នៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សានិងសន្តិភាព” ក្នុងបញ្ជីបេតិកភណ្ឌពិភពលោក នារសៀលថ្ងៃសុក្រ ទី១៨ ខែកក្កដា ឆ្នាំ២០២៥ នៅពហុកីឡដ្ឋានជាតិអូឡាំពិក។
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈបានថ្លែងថា “នាឆ្នាំ២០១៩ ក្រោមគំនិតផ្តួចផ្តើម ដំបូងរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ដែលបានណែនាំក្រសួងវប្បធម៌និងវិចិត្រសិល្បៈ និង ក្រសួងពាក់ព័ន្ធរៀបចំចុះ “បូជនីយដ្ឋានចងចាំនៃកម្ពុជា” ក្នុងបញ្ជីបេតិកភណ្ឌពិភពលោក សម្រាប់ជាការចងចាំរបស់យុវជនជំនាន់ក្រោយរាប់ពាន់ឆ្នាំទៅមុខ។ តាមរយៈ អនុសាសន៍ដ៏ខ្ពង់ខ្ពស់នេះ ក្រុមការងារជំនាញរបស់ក្រសួងវប្បធម៌និងវិចិត្រសិល្បៈ និងស្ថាប័នជំនាញពាក់ព័ន្ធ បានរៀបចំស្រាវជ្រាវ ចងក្រងឯកសារបច្ចេកទេស និងបានបង្កើតក្រុមការងារបច្ចេកទេសដែលមានសារមន្ទីរ ឧក្រិដ្ឋកម្មប្រល័យពូជសាសន៍ទួលស្លែងជាអ្នកទទួលបន្ទុកសម្របសម្រួលស្រាវជ្រាវ និងប្រមូលផ្តុំចងក្រង ឯកសារ”។
លោកជំទាវរដ្ឋមន្ត្រីក្រសួងវប្បធម៌និងវិចិត្រសិល្បៈ បានបន្តថា”នាងខ្ញុំតំណាងក្រុមការងារ និង ក្រសួងស្ថាប័នពាក់ព័ន្ធរួម ក៏ដូចជាប្រជាជនកម្ពុជាគ្រប់ៗរូប ពិតជាមាន សេចក្តីរំភើប និងរីករាយឥតឧបមា សូមសម្តែងនូវការអបអរសាទរចំពោះព្រឹត្តិការណ៍ប្រវត្តិសាស្ត្រថ្មីមួយទៀត សម្រាប់ជាតិយើង ហើយដែលជាឧត្តមប្រយោជន៍សម្រាប់ប្រជាជាតិ និងប្រជាជនកម្ពុជាគ្រប់ៗជំនាន់ទាំង ពេលបច្ចុប្បន្ន និងនាពេលអនាគត។ អ្វីៗទាំងអស់នេះ គឺជាសក្ខីភាព និងជាភាពសុខដុមរបស់ប្រជាជាតិយើង ក្រោមដំបូលនៃសុខសន្តិភាពពេញលេញដែលជាផ្លែផ្កានៃនយោបាយឈ្នះ-ឈ្នះ របស់ សម្តេចអគ្គមហាសេនា បតីតេជោ ហ៊ុន សែន និងការបន្តវេនប្រកបដោយចក្ខុវិស័យថ្លៃថ្លារបស់ សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលនៃព្រះរាជាណាចក្រកម្ពុជា”។
លោកជំទាវរដ្ឋមន្ត្រីក្រសួងវប្បធម៌និងវិចិត្រសិល្បៈបានថ្លែងបន្តថា “ការចុះ “បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្ម មកជាមណ្ឌលផ្សះផ្សានិងសន្តិភាព” ក្នុងបញ្ជីបេតិកភណ្ឌពិភពលោក ដោយផ្អែកលើលក្ខណៈវិនិច្ឆ័យទី៦ ពោលគឺ “ជាទីតាំងពាក់ព័ន្ធផ្ទាល់ ឬជាក់ស្តែងទៅនឹងព្រឹត្តិការណ៍ ឬទំនៀមទម្លាប់រស់នៅជាមួយគំនិត ឬជំនឿ ប្រកបដោយស្នាដៃសិល្បៈ និងអក្សរសាស្ត្រ ដែលមានភាពលេចធ្លោបំផុតក្នុងសកល”។ លក្ខណៈវិនិច្ឆ័យនេះ គឺបង្ហាញពីកិច្ចខិតខំប្រឹងប្រែងរបស់រាជរដ្ឋាភិបាលនិងប្រជាជនកម្ពុជា ចំពោះការចងចាំ ការស្វែងរកយុត្តិធម៌ ការបង្រួបបង្រួមនិងការផ្សះផ្សាជាតិ និងសន្តិភាព ហើយក៏ជាគំរូសម្រាប់ពិភពលោកចំពោះការតស៊ូដ៏យូរអង្វែង របស់កម្ពុជា ដើម្បីប្រែក្លាយពីប្រទេសដែលញាំញីដោយសារអំពើឧក្រិដ្ឋកម្ម និងសង្គ្រាមមកជាប្រទេស ដែលពោរពេញដោយសុខសន្តិភាពនិងការអភិវឌ្ឍ”។
សូមជម្រាបថា ជោគជ័យ នៃការចុះបញ្ជីទីតាំងទាំងបី នៃ «បូជនីយដ្ឋានចងចាំនៃកម្ពុជា»រួមមាន អតីតមន្ទីរឃុំឃាំង ម-១៣,សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ស-២១ និងមជ្ឈមណ្ឌលប្រល័យពូជសាសន៍ជើងឯក៕
