ក្រៅពីវិទ្យុអាស៊ីសេរី និងវិទ្យុអឺរ៉ុបសេរីដែលទទួលជំនួយមួយផ្នែកពីទីភ្នាក់ងារផ្តល់ជំនួយអាមេរិកដើម្បីប្រព័ន្ធផ្សព្វផ្សាយសកល ហៅកាត់ថា USAGM វិទ្យុសំឡេងសហរដ្ឋ អាមេរិក VOA រងប៉ះពាល់ខ្លាំងជាងគេដោយសារបទបញ្ជា បង្កកជំនួយរបស់លោកដូណាល់ ត្រាំ។ នៅថ្ងៃសៅរ៍ទី១៥មីនា បុគ្គលិកប្រមាណ ១៣០០នាក់រួមទាំងប្រធានរបស់វិទ្យុ VOAបានទទួលសារអេឡិចត្រូនិកដែលជូនដំណឹងថា ពួកគេត្រូវផ្អាកពីការងារ មិនអាចចូលទៅក្នុងការិយាល័យធ្វើការនៅរដ្ឋធានីវ៉ាស៊ីនតោន និងត្រូវប្រគល់កាតអ្នកកាសែត សម្ភារៈទូរស័ព្ទ កុំព្យូទ័រទៅឲ្យស្ថាប័នវិញ។
វិទ្យុសំឡេងសហរដ្ឋអាមេរិក VOAត្រូវបានបង្កើតឡើងនៅឆ្នាំ ១៩៤២ នៅក្នុងគោលដៅតទល់នឹងសំឡេងឃោសនារបស់ក្រុមណាហ្ស៊ី និងអធិរាជជប៉ុនក្នុងសម័យសង្រ្គាមលោកលើកទី២។ ចំណែក វិទ្យុអឺរ៉ុបសេរីដែលទទួលបានថវិកាជំនួយមួយផ្នែកពីទីភ្នាក់ងារអាមេរិកដែរនោះត្រូវបានបង្កើតឡើងនៅឆ្នាំ១៩៥០នៅក្នុងសម័យសង្រ្គាមត្រជាក់ ដើម្បីទប់ទល់នឹងការពង្រីកឥទ្ធិពលរបស់ក្រុមកុម្មុយនិស្តនៅអឺរ៉ុបខាងកើត និងអាស៊ីកណ្តាល។
បើតាមការចុះផ្សាយរបស់ប្រព័ន្ធផ្សព្វផ្សាយអង់គ្លេស BBC វិទ្យុសំឡេងសហរដ្ឋអាមេរិកបានផ្សព្វផ្សាយព័ត៌មានដំបូងរបស់ខ្លួនដោយខ្ចីអង់តែនរបស់BBC។ ប៉ុន្តែ នៅឆ្នាំ ១៩៧៦ ប្រធានាធិបតីអាមេរិក លោកGerald Ford បានចុះហត្ថលេខាលើធម្មនុញ្ញ សាធារណៈរបស់VOA ដើម្បីធានាឯករាជ្យភាពនៃខ្សែបន្ទាត់វិចារណកថារបស់វិទ្យុសំឡេងសហរដ្ឋអាមេរិក។
ប្រធានរបស់វិទ្យុ VOA បច្ចុប្បន្នយល់ថា បទបញ្ជារបស់រដ្ឋបាលលោកដូណាល់ ត្រាំបានបិទខ្ទប់ រារាំងVOA មិនឲ្យធ្វើការងារដ៏សំខាន់របស់ខ្លួន ជាពិសេសនៅក្នុងបរិបទសព្វថ្ងៃ ដែលសត្រូវ គូប្រជែងរបស់អាមេរិក ដូចជា អ៊ីរ៉ង់ ចិន និងរុស្ស៊ីចាក់លុយរាប់ពាន់លានដុល្លារដើម្បីបង្កើតសាច់រឿង បង្អាប់បន្ថោកមុខមាត់របស់អាមេរិកនៅក្នុងពិភពលោក។
អ្នកកាសែតម្នាក់របស់ VOA ដែលសុំមិនបញ្ចេញឈ្មោះបាននិយាយប្រាប់ទូរទស្សន៍CBSថា គាត់តែងតែគិតដល់ប្រយោជន៍របស់អាមេរិកមុនគេ នៅពេលនិយាយពីជំហរនយោបាយរបស់រដ្ឋាភិបាលអាមេរិក។ នៅក្នុងការងារផ្សព្វផ្សាយទៅកាន់អ្នកស្តាប់ដែលមិនយល់ភាសាអង់គ្លេស គាត់ឧស្សាហ៍ផ្តោតលើលទ្ធិប្រជាធិបតេយ្យអាមេរិកដែលជាប្រព័ន្ធនយោបាយដ៏ល្អជាងគេបំផុត។
រដ្ឋបាលលោកដូណាល់ ត្រាំ មិនបានពន្យល់ឲ្យបានច្បាស់លាស់ថា តើវិទ្យុសំឡេងសហរដ្ឋអាមេរិកនឹងត្រូវបិទចោលទាំងស្រុងឬយ៉ាងណា។ យ៉ាងណាក៏ដោយ ការសម្រេចលើជោគវាសនារបស់វិទ្យុរដ្ឋអាមេរិកស្ថិតក្នុងដៃរបស់សភាអាមេរិកដែលជាអនុម័តកញ្ចប់ថវិកា។ ប៉ុន្តែ ទៅតាមបទបញ្ជារបស់លោកដូណាល់ ត្រាំ ប្រធានរបស់ស្ថាប័នដែលទទួលថវិកាពីរដ្ឋាភិបាលអាមេរិកត្រូវតែកាត់បន្ថយទំហំ និងវត្តមានរបស់ខ្លួនឲ្យនៅតូចបំផុតទៅតាមការចែងរបស់ច្បាប់។ អ្នកនាំពាក្យរបស់សេតវិមាននិយាយថា បទបញ្ជារបស់លោកដូណាល់ ត្រាំនឹងធានាថា អំណើះតទៅ លុយរបស់អ្នកបង់ពន្ធអាមេរិកនឹងមិនត្រូវគេយកទៅចាយដើម្បីធ្វើការឃោសនាជ្រុលនិយម។ តាំងពីនៅអាណត្តិទី១ លោកដូណាល់ ត្រាំធ្លាប់រិះគន់ប្រព័ន្ធផ្សព្វផ្សាយព័ត៌មានអាមេរិក ដែលលោកចាត់ទុកថា លំអៀង និងជាសត្រូវរបស់ប្រជាជន។
លោក Michael Abramowitz និយាយថាស្ទើរតែបុគ្គលិកទាំងអស់របស់VOA ចំនួន១៣០០នាក់ដែលមានតាំងពីអ្នកកាសែត អ្នកផលិតកម្មវិធី និងអ្នកជំនួយការបច្ចេកទេសត្រូវផ្អាកពីការងារ។ ខណៈដែលបុគ្គលិកពេញសិទ្ធិត្រូវប្រាប់ឲ្យឈប់សម្រាក ដែលមានស្មើនឹងការបញ្ឈរជើងចោល មិនឲ្យចូលធ្វើការ អ្នកកាសែតឯករាជ្យ និងអ្នកចុះកិច្ចសន្យាធ្វើការរយៈពេលខ្លីនៅទូទាំងពិភពលោកត្រូវបានជូនដំណឹងថា ពួកគេត្រូវបញ្ឈប់ពីការងារ ព្រោះគេលែងមានលុយដើម្បីបើកប្រាក់ខែតទៅទៀត។
នៅមុនបទបញ្ជាឲ្យផ្អឹបកញ្ចប់ជំនួយរបស់ទីភ្នាក់ងារដើម្បីប្រព័ន្ធផ្សព្វផ្សាយសកល វិទ្យុVOA មានបុគ្គលិកសរុបប្រមាណ២០០០នាក់និងមានថវិកាប្រចាំឆ្នាំ ២៦០លានដុល្លារ។ ផ្សាយក្នុងភាសាចំនួន ៤៩ វិទ្យុសំឡេងសហរដ្ឋអាមេរិកមានអ្នកស្តាប់ជាង ៣៦៦លាននាក់ នៅអាស៊ី អឺរ៉ុប និងតំបន់ដើមបូព៌ា ជាទីដែលខ្សត់ខ្សោយប្រព័ន្ធផ្សព្វផ្សាយឯករាជ្យ និងសំបូរដោយរបបដឹកនាំផ្តាច់ការ ដូចជានៅភូមា កូរ៉េខាងជើង អ៊ីរ៉ង់ បេឡារុស រុស្ស៊ីជាដើម។
ចំពោះរដ្ឋមន្រ្តីការបរទេសឆែក វិទ្យុអឺរ៉ុបសេរី និងវិទ្យុវីអូអេ នៅតែប្រភពផ្តល់ព័ត៌មានសេរី និងគួរឲ្យជឿទុកចិត្តសម្រាប់ប្រជាជននៅអឺរ៉ុបខាងកើត។ ដូច្នេះ បើរដ្ឋបាលលោកដូណាល់ ត្រាំ បំបិទសំឡេងវិទ្យុខាងលើតាមរយៈការកាត់តម្រឹម ច្រឹបការចំណាយរបស់ស្ថាប័នផ្សព្វផ្សាយព័ត៌មានដែលជាក្រុមហ៊ុនមេរបស់VOA និងវិទ្យុអឺរ៉ុបសេរី នោះវាមិនត្រឹមតែជាការខាតបង់ដ៏ធំចំពោះប្រជាជនដែលខ្វះព័ត៌មានពិត ត្រឹមត្រូវនៅតាមបណ្តាប្រទេសខាងលើនោះទេ ប៉ុន្តែវាប្រផ្នូលដ៏អាក្រក់សម្រាប់អ្នកដែលជឿជាក់ទៅលើលទ្ធិប្រជាធិបតេយ្យ។ បិទសំឡេងរបស់វិទ្យុដែលផ្សព្វផ្សាយពី លទ្ធិប្រជាធិបតេយ្យ សិទ្ធិសេរីភាពជាមូលដ្ឋានរបស់មនុស្សជាតិ ចង់ ឬមិនចង់ គឺជាអំណោយដ៏មហាសែនធំមួយរបស់លោកដូណាល់ ត្រាំទៅឲ្យសត្រូវរបស់អាមេរិក។ នេះជាពាក្យថ្លែងជាមួយការសោកស្តាយដ៏ធំធេងរបស់ប្រធានវិទ្យុអឺរ៉ុបសេរី៕